Food, Civil Supplies & Consumer Affairs Minister Pu H.Rohluna chuan vawiin chhun khan Darlawn ah M/S Sangi Indane Gramin Vitrak Gas Agency a hawng. Mipui kalkhawmte hmaa thusawiin Minister chuan mipuite chawikan nan leh hamthat nana kawng hrang hranga hma a lak dante a tarlang a, tunlaia Gas harsatna chu Mizoram chauh tawn nilovin ram pum harsatna a nih thu a sawi lang a. India chuan Gas a mamawh atanga 25 % chauh a siamchhuah thu te, khawvel market-a Gas man a san thu te, mipuiin man tlawm zawka kan chan theih nana Gas bur pakhat zelah sorkar laipui chuan Rs 500.28 a sen zel dan te a sawifiah bawk. Gas harsatna chungchangah mipuiin a chhan dik tak kan hriatfiah a pawimawh a ni, a ti. Darlawn-a Gas Agent thar te chuan an khua chauh huap lova khaw thenawmte pawh a enkawl tel a tul thu te a sawi lang bawk. Darlawn bial hmasawnna tura sorkarin kawng hrang hranga hma a lak mek dante a tarlang bawk.

Bialtu MLA Pu R.L.Pianmawia, Deputy Govt. Chief Whip pawhin Indian Oil Corporation (IOC) leh Sorkar-in an harsatna te hriatpuia duhsak taka hma a lakpuinaah lawmthu a sawi a, Electric Sub Station pawh kar leh maia hawn a nih tur thu te a sawi lang bawk.

Darlawn Gas Agency hawnna inkhawm, BRC Hall-a neih hi Darlawn VCP Pu R.D.Lawmkima’n a kaihruai a, Pu Z.Lungdim, Plant Manager, IOC, Mualkhang leh midang ten thusawina hun an hmang bawk. Minister hian mi 5 te hnenah Gas Connection thar a hlan nghal bawk a ni. Minister hi Aizawl atangin Pu Vanlalsawma, IFS, Conservator of Forests, Northern Circle leh Department Officer thenkhat ten an tawiawm a ni.