Vawiin chawhma dar 10:30 khan Champhai I&PR Auditorium ah hmun kil khawr zawka cheng mipuiten hriselna tha zawk an neih theihna turin Champhai PHE WATSAN Division bultumin Champhai Block chhunga Health Workerte pualin Total Sanitation Campaign neih a ni.
He hun hmanpuitu Champhai DC Pu Vijay Kumar Bidhuri chuan Champhai khawpui chhungah No Vehicle Day hman ani chunga hetiang hun pawimawh nei thei tura lo kalte chungah lawmthu sawiin, Champhai District chhungah PHED WATSAN te hma lakna leh VC tin te report dana Champhai District in tinin inthiarna hmun Ek In an nei chu Champhai District Bawrhsap Pu.Vijay Kumar Bhidhuri chuan lawmthu a sawi. Changkanna tehfung pawimawh tak chu thianghlimna leh mipui vantlang hriselna anih vangin hemi kawnga chak zawka hmalak anih theih nan PHE leh Health Department-te a theih chinah tangho se tha a a hriat thu leh chhungkaw tinin inthiarna mumal tak an neih a tul bakah in vawnfaina kawngah Champhai District chhunga Health Worker ten mahni awmhmun theuhah uar taka zirtirna lo pe tura a duh thu sawiin Ram changkang leh changkang lo tehna pawimawh ber pakhat chu a chhunga cheng mipui te hriselna ah a innghat a, ram hrisel nei tur chuan faina leh thianghlimna kan ngaihpawimawh a ngai a ni tiin Champhai DC chuan hriselna kawnga mawhphurhna sang tak an nei tih hria a theihtawp chhuah turin trainers te chu a chah a ni.
He hunah hian Champhai PHE WATSAN Division SE Er. C. Chawnghnuna leh EE Er. K.Zohmingliana ten vantlang hriselna chak zawka kalpui anih theihna tura an hmalak mek, chhungkaw tinin Inthiarna mumal tak an neih theihna tur leh tuichhia leh bawlhhlawh mumal taka thehthang anih theihna tura Health Workerte nen thawhhona tha neih a pawimawhna tarlangin, hemi chungchanga a bultumtu Champhai DC Pu Vijay Kumar Bidhuri hnenah lawmthu sawiin, Health Department nena tangkawp Total Sanitation Campaign hi Champhai District chhungah chauh kalpui anih thu leh hetiang training hi Ngopa, Khawzawl leh Khawbung RD Block huamchhungah hlawhtling taka neih a nih thu tarlan a ni bawk.
Vantlang hriselna kawnga PHE Department in hma a lak chungchang zirtirna leh hrilh hriatna bakah Health Worker ten hma an lakpui dan tur chungchang SE Er. C. Chawnghnuna he training programme kaihruaitu chuan a sawi a, Thianghlimna –Sanitation ah District Bawrhsap in a tuipui na leh hma lakna kawnga a puih na ah lawmthu a sawi. Champhai Medical Officer Dr. Lawrence Lalramenga’n Tuithianghlim leh Hriselna inkaihhnawih dan zirtirna a nei bawk. He training hian vawiin nileng a awh ang.
