Bawngkawn-a Brigade ram luah thin chu Mizoram sawrkar chuan mipui tana chhawr tangkai tur leh chhenfakawm tham thil chi hrang hrang bunna atan a ruahman a. Tukin zing dar 7:00 khan helai hmuna kutthlak dan tur ruahman lawkte chu Urban Development & Poverty Alleviation (UD&PA) Minister Pu Zodintluanga chuan a tlawh a; Minister hi Pu S. Laldingliana, Parliamentary Secretary te, Pu RL Rinawma, Principal Secretary, UD&PA te, Pu Lianchungnunga, Engineer-in-Chief te bakah Engineer te, UD&PA leh Sports Department officer-ten an tawiawm a; Bawngkawn Local Council Chairman leh member-ten Minister hi an lo dawngsawng a ni.

Sipaiin an luah thin avanga Brigade ram ti-a hriat lar thin hi tunhma chuan project ram ti-a sawi thin a ni a; sawrkar ram humhalh, vantlang tana thil chhenfakawm dinna hmun atana ruahman lawk a ni reng thin a ni. Sipaiin an chhuahsan tak hnu-ah hian Mizoram sawrkar-a UD&PA Department chuan helai hmunah hian cheng vaibelchhe 60 sengin Urban Haat te, Auditorium te, Zirna hmun changtlung tak te, Hospital te, Fire & Emergency Services hmunpui te leh thil dangte a din dawn a ni. Urban Haat-ah hian miretheite tan an thil dehchhuah zawrhna tur hmun changtlung tak siam a ni ang a; kut-themthiam zirna te leh training-na chi hrang hrangte pawh a kengtel dawn a ni. Auditorium sak tur hi mi 2000 leng tura ruahman a ni a; India hmar-chhaka Auditorium changkang ber-te el pha tura duan lawk a ni nghe nghe. Tin, hospital pangngai aia changtlung zawk multi-speciality hospital din tum a ni bawk. Aizawl chhuah lamin an mamawh em em Educational Institution chhenfakawm tak pawh helai hmunah hian din tura ruahman a ni. Hengte bakah hian mipui tana remchang turin Brigade Ground leh a chhehvel chu nasa taka cheibawl tum a ni a; Brigade ram chhunga motor kawng pawh motor insulpel zut zut thei tura zauvin PWD lamin an chei tha dawn a ni.

UD&PA Minister Pu Zodintluanga chuan, “Aizawl khawpui chei that pahfawm a mipui tana thil chhenfakawm tur din belh zel hi sawrkar duh dan a ni a. Chutiang atan chuan Brigade ram pawh hi ruahman a ni a; sum senso tur cheng vaibelchhe 60 pawh kan hum reng tawh a ni. Mipui tana rotliang tur thil din tum a, kut kan thlakna turah hian mipuite thlawpna kan ngen a, a bik takin Bawngkawn khawtlang nena thawhhona tha kan mamawh dawn a ni” a ti. Pu RL Rinawma, Principal Secretary, Land Revenue & Settlement chuan, “Brigade ram hi hmanlai ata tawh sawrkar ram a ni a; chuvangin mipui mamawh dinna atan sawrkarin a ruahman a; helai hmuna mipui mamawh din hi sawrkar chuan a ngai pawimawh ber bawk a ni” a ti bawk. Bawngkawn Local Council Chairman Pu H. Lalawmpuia leh khawtlang hruaitu dangte pawhin Brigade rama sawrkar ruahmanna siam chu a puitlin hun an nghahhlelh thu sawiin, kawng engkima sawrkar tawiawm tlat an tum thu Pu Zodintluanga hi an hrilh a ni.

Tukin vek khan Sports Minister Pu Zodintluanga chuan Ramhlun Indoor Stadium sak mek chu Parliamentary Secretary Pu S. Laldingliana leh Sports Council hotute nen an tlawh bawk a. Ramhlun Indoor Stadium hi kum 5 (nga) tha zet hluihlawn a nih hnu-ah Sports Minister Pu Zodintluanga ruahmannain a bul atanga sak tan leh a ni a. Leizawl-ah motor parking siam a ni a; a chhawng khatna chu a remchan dan ang zela hman theih tura ruahman niin, a chhawng chung berah hall phuisui taka wm tura ruahman a ni a. Kumin chhung hian hawn hman ngei an tum thu a enkawltute chuan Sports Minister hi an hrilh a ni.