Nimin 11.5.2012 khan Transport Minister Pu PC Zoram Sangliana chuan Kolasib Vengthar Community Centre, Rs 28,11,100.00 senga Integrated Housing for Slum Development Project (IHSDP Project) hnuaia infrastructure component atanga sak a hawng a. Mirethei In sak tanpuina tangka 3rd instalment mi 129 hnenah a sem bawk.

Thu sawiin Pu PC Zoram Sangliana chuan, an thutiam tihlawh tlingtu Community Centre hawn a ni chu a lawmthu a sawi a. Kolasib chu IHSDP hnuaia mirethei In 300 sak bul tanna hmun a ni a. Tunah hian he project hmang bawk hian hmunhma panna leh chei hna infrastructure siam hna tan leh mek a ni a. Kolasib District chhungah hian Higher Secondary School din tura alo tiam tawh pawh reilote ah tih puitlin a nih a beisei thu a sawi a ni.

Minister chuan, tuna Pu Lal Thanhawla hruai sawrkar hian phai atangin tangka kan hawn thu kan tlangaupui ve ngai lova, amaherawhchu a takin a mamawhte hnenah kan sem thin a ni, a ti a. An sawrkar apiangin mirethei te tana hnemhnanpui tur scheme duang chhuakin Remna leh Muanna atana Lal thutthleng an ken bakah Rangva sem, NLUP etc. a takin an thawk a, buai avanga mizote rilru leh sukthlek chhe tawh tuamdam turin theihpatawp vawiin ni thlengin kan chhuah a ni, a ti.’ Policy leh programme tha kan neihte hi lo thlir zel rawh u,’ a ti a ni.

Vengthar Community Centre hi 8th July 2011 khan UD&PA Department hnuaiah thawh tan a ni a. 18th Jan 2012 khan thawh zawh a ni. RCC bang niin a chungah Dyna Roof hman a ni a, a zau zawng hi 267.00 sqm a ni a, mihring 300 len theihna a ni.

Kolasib a mirethei In sakna ISHDP hi 300 sak tura ruahman ah 211 sak peih thawkhat tawh a ni a. Chenna In 89 leh hmasawnna ruhrel (infrastructure) thawh tan tum leh mek a ni.