Hun rei tak Assam Rifles Quarterguard kawta Laipui awm thin,kum 9 chhung bo chu a hmun ngaiah dah kir leh a ni ta a. Laipui dah let leh puanzarna inkhawm hi vawiin khan Assam Rifles Quarterguard kawtah vek 23 Sector Assam Rifles in an buatsaih a, Chief Minister Pu Lal Thanhawla leh INTACH Mizoram Chapter Convener Pu P. Rohmingthanga ten Laipui hi vantlang hmuh thei turin a khuhna hlipin an puangzar a ni.

Chief Minister chuan Mizote rohlu leh Aizawl mawitu, Laipui a hmun ngaiah dah kir leh a ni chu mitin thinlung tilawmtu anih ngei a beiseiawm ani a ti a. Assam Rifles ten an thupui ‘Tlangmite Thian’ anih ang ngeia a hmun ngaia rawn dah kir an remti chu an chungah lawmthu a sawi a. Hmuh kir leh anih ngei theih nana tha thlah lova beitu, INTACH Mizoram Chapter chungah leh, Mizoram Legislative Assembly in hmuh let lehna tura resolution lungrual taka an passed thu-ah lawmthu a sawi bawk a. An ni bakah Union Home Minister, Assam Rifles Director General chungah leh, abikin 23 Sector Assam Rifles DIG Brig S.P.Rawat, Seva Medal in a mimal ang pawha theihtawp a chhuahna ah lawmthu a sawi bawk a ni.

INTACH Mizoram Chapter Convener Pu P. Rohmingthana pawhin thusawiin, an pawl tum ber chu kan pi leh pute atanga rohlu kan neih te humhalh leh vawnhim a ni a ti a. Laipui pawh hi Mizote rohlu, kum 100 chuang Aizawl mawitu ani a ti a. Kum 2003 a a chin hriat loha a awm atang khan INTACH chuan a theihna apiangah hmuh let leh tumin hma alak thu a sawi a. Hmuh let leh anih chungchangah, abik takin Brig Rawata’n Mizote rilru hrethiama, an hotute thinlung a hmin theihna avang leh Chief Minister Pu Lal Thanhawla hmalakna vang a ni ber a ni a ti.

Brig S.P. Rawat pawhin thu sawi bawkin, laipui a hmun ngaia dah keir leh a nih theih nana INTACH Mizoram leh Chief Minister te hmalakna fakawm a tih thu a sawi a. Laipui dah kir leh tak hi Assam Rifles Battalion kutah awm lovin, 23 Sector Assam Rifles enkawlna hnuaiah a awm tawh tur thu a sawi bawk a ni.

Laipui hi indo lawnga hman thin, kum 1857 a ‘Sepoy Mutiny’ ah khan sipai hel kutah a awm palh ang tih hlauin Chittagong luiah paih thlak a ni a. Sepoy Mintiny buaina a reh hnuin lui atanga la chhuak lehin, Rangamati-ah lak a ni a, chuta tang chuan Lungleiah lak luh leh a ni. Kum 1898 khan Lushai Hills District Superintendent Lt.Col Sheakspear an Aizawla Lushai Hills Military Police Battalion (kum 1917 a Assam Rifles tia thlak) Quarterguard kawta Queen Victoria lim (bust) -a awm chin chunglam - lan ropui tir nan, a ding leh veia dah turin Lunglei atangin laipui hi Aizawlah ala phei a ni. Lt Col Sheakspear hian laipui pakhat zawk hi ‘Battle of Waterloo, 1815’ a hman tawh ngei nia a rin thu a ziak bawk.

Lungleiah hian laipui hi hman lohin hun engemawchen a awm a. Aizawl-ah engtin chiah nge lak phei anih hriat a nilo nain, sakawr emaw sabengtung emaw hmanga lak anih rin a ni. Lushai Hills Military Police Battalion thuneihna hnuaia a awm thu engmah hriat a nilova. Chutiahnehin, Aizawla alo awm dan hi civil administration thuneitu kut liau liau avang zawk niin a lang. Hetia kum tam tak Quarteguard kawta mawi leh ropui taka a awm lurh lai hian, kum 2003 khan a awmlo ta mai a. A awm loh hi 1st Assam Rifles insawnchhuah nen a inrual chiah nghe nghe a ni.

Laipui bo chungchangah hian hmuh let leh tumin hmalakna engmah kum 5 chhung vel chu a awm lova, kan ui thu chanchinbuah te leh a mimal ang ten kan tarlang mai thin chauh kha a ni a. Kum 2008 laihawl vel khan INTACH in hma la tanin, hmuh kir leh ngei anih theihna tura hma la turin Mizoram Governor hnehah ziakin ngenna an thehlut a. Assam Rifles Director General pawh, Governor thurawn angin an hmu bawk a ni. An ni bakah hian Defence Secretary leh Home Secretary te hnehah pawh zualkoin, laipui chu a awmna hmun ngai, Aizawl Quaterguard kawta Assam Rifles te enkawl tura dah kir leh chu an duh ber a ni tih INTACH hian an tarlang zel bawk a. Hetihlai hian INTACH hian laipui hi 1st Assm Rifles te awmna, Nagaland-ah a awm tih an hre tawh nghe nghe a ni.

INTACH ngenna an rawn chhanah, Home Ministry chuan laipui hi British indo lawnga awm thin, indo lawmman atana Assam Rifles hnena British in a pek a ni tiin, Assam Rifles Museum a dah hlen tur a nih thu an rawn hriattir ta a. INTACH chuan nasa taka Home Ministry chu hnial letin, Aizawl Quarterguarda laipui dahtu Lt Col Sheakspeara’n a dah chhan ang ngeia Qurterguard kawta rawn dah kir leh Mizote thil rohlu (heritage) a ni tih chu an tanna a ni tih an hriattir nawn ve leh nghal a ni. Hun lokal zelah INTACH hian Chief Minister Pu Lal Thanhawla hnenah hma la tura ngenin, Chief Minister chuan atul anga hma la nghalin, Union Home Minister Pu P. Chidambaram leh Assam Rifles Director General, Major General R.K. Lakhanpal te chu a sawipui a, an ni chuan Mizote rilru rawn hrethiamin leh Assam Rifles thupui ‘Tlangmite Thian’ tih anih angin, laipui hi kumin May ni 15 hma ngeia rawn dah kir leh a ni ang tih Pu Lal Thanhawla an tiam ang ngeiin Laipui hi Aizawl alo thleng ta a ni.