Nimin (1.12.2015) khan Trade & Commerce, Industries, etc changtu Minister leh Lengteng bialtu MLA ni bawk Pu H. Rohluna chuan IWMP hnuaia Dulte Market Shed leh Chhawrtui a Pig Sty sak thar te chu a hawng. Minister hi DRDA Project Director Pu CC Lalchuangkima, DSCO leh IWMP Champhai-I atan PIA ni bawk Pu Lalrinzama bakah Officer dangten an tawiawm a ni.

Dulte market shed hawnna hun buatsaih ah Trade and Commerce Minister chuan mipuite tan eizawnna ngelnghet siamna kawnga hmalakna thar siam zel a ni chu lawmawm a tih thu a sawi a. Dulte khaw mipuiten thlai zawrhna hmun thar chu tangkai taka an hman a duhsak thu leh, mahni thlai thar ngei te zuar uar zel turin a chah a. Bazar hmun te hi vawn fai uluk ngai leh bal hma tak anih avangin neitu rilru dik tak pu a, thianghlim taka vang thin turin a chah bawk a ni. Bazar sak hawnna hun neih zawh hian Minister chuan Dulte MUP ten MLA Fund atanga an pawl building an sak chu a hawng nghal a ni.

Dulte a hun hman zawh hian Minister chuan Chhawrtui a IWMP hmalakna hnuaia vawkpui 20 len theihna tur Pig Sty chu a hawng leh a. Sorkarin ei leh bar a intodelh theihna kawng siam a vawkin changtlung tak, tunlai thiamna hmanga chhawp sak diam an ni chu an vanneih zia hre reng chungin taimakna thlah lova hlawkna tha um in mipuite chu thawk ve turin a chah a. IWMP mai bakah NLUP hmalakna ah te pawh, Sorkarin ruahmanna a siam ang zulzuia mipuiten hna kan thawh chuan teirei peih deuh te lo ngai thin mahse a hlawk nge nge zel a ni, tiin Minister chuan mi hlawhtling dangte dainhmun tha thlir a, an hlawhtlin nana an tha sen te ngaihtuah nachang hre silo a nuamsa taka hlawhtlin tum chu a ziktluak theihloh thu a sawi tel a ni.

IWMP Champhai-I Project hian Kawlkulh, Dulte, Puilo leh Chhawrtui a huam a. Cheng nuai 6 seng a Dulte Market Shed sak hi kumin July atang khan ahmun tur laih hna thawk tanin, sum bakah hlawhfa tha 347 sen a ni a, Watershed Committee member ten hlawh tello a hnatlang in tha 70 an seng bawk a. November ni 28 khan sak fel a ni a, thlai zawrh phona bakah thingpui dawr tur sak tel a ni.

Chhawrtui Pig Sty hi feet 70x30 bial a lian niin, cheng nuai 13 seng a sak a ni a. A vawk in hi bial 20 ah dai dan leh niin, a sakna atan hian chengnuai 13 sen a ni a. A enkawltu riahna tur leh vawkchaw dahna tur sak a ni bawk. School Education Minister hian Chhawrtui khua High School, Middle School, Primary School leh St. Joseph's School tan football a pe bawk.