Sericulture Department, Aizawl District hnuaia NLUP 3rd Phase Second Instalment chu vawiin khan Sericulture Minister Dr B.D.Chakma-in Sericulture Conference Hall, Sericulture Directorate, Chaltlang ah Beneficiary 98 te hnenah a sem.

NLUP tanpuina sem inkhawm hi Pu Lalrozama, Jt. Director, Sericulture Department chuan a kaihruai a, Minister chuan thusawiin NLUP project hlawhtlinna chu tanpuina dawngtu beneficiary te kutah a inghat tlat a ni a ti a, tanpuina sum an dawn te chu a hmanna turah dik taka hmanga, mahni intun nana hmang theuh turin a chah. Central Sawrkar ah Sericulture hnuaiah project tam tak a awm thu sawiin department-in chak taka a bawhzui mek thu te a tarlang bawk.

Sericulture Director Pu Lalrinmawia pawhin fuihna thu sawiin Sericulture chu buh chin aia hlawk zawk, eizawnna tlak a ni, a ti a. Hausak thur thurna ni lo mah se sericulture chu chhungkaw intodelh theihna a ni tiin, chhungkaw intun nun nana Sawrkarin NLUP hmanga a tanpuina chu hlawhtlinpui tum theuh turin beneficiary kalkhawm te chu a chah bawk. Cocoon thar chhuah chu a la tam tawk lo tiin kum thar ah chuan nasa zawka tan la turin a fuih bawk.

Sericulture Department, Aizawl District hnuaiah hian NLUP tanpuina 1st Phase ah beneficiary 281 hnenah leh 2nd Phase ah beneficiary 341 hnenah Rs 1,00,000 /- theuhvin sem an ni tawh a, 3rd Phase ah beneficiary 98 hnenah 1st Instalment Rs 10,000 /- theuh sem tawh niin vawiin hian 2nd Instalment Rs 19,800 /- theuh sem an ni leh ta a ni. 4th Phase atan beneficiary 34 hnenah Rs 10,000 /- theuhvin sem an ni tawh bawk. Sericulture hnuaia Aizawl District huam chhunga NLUP tanpuina sem tawh zawng zawng chu Rs 6,54,60,400 /- a ni.

NLUP tanpuina sem zawh hnu hian chawhnu lamah mithiam ten NLUP dawngtute hi Technical Training an neihpui zui a ni.