Aizawl 19th Oct., 2012 : Vawiin khan Agriculture Minister Pu H. Liansailova leh Parliamentary Secretary Pu K.S. Thanga hovin Agriculture Department Officer-te chuan kumin July thla atanga September thla chhunga an hmalakna leh an hmasawnna hrang hrang thlirletna (Quarterly Review Meeting) Agriculture Committee Room-ah an nei.
He Review Meeting Pu Lalramthanga, Principal Secretary, Agriculture kaihhruaiah hian Dr. C. Lalzarliana, Agriculture Director chuan Power Point hmangin Agriculture Department hmalakna hrang hrang – SRI, Improved Package of Practices leh Improved Jhum hmanga buh chin dan te, Oil Palm chungchang leh Plan XII-na chhunga an Department hmalakna tur hrang hrang te a entir a, Champhai District-a buh natnain buh a tihchhiat te pawh a lem nen a entir bawk.
He meeting hmanpuitu Minister, Pu H. Liansailova chuan Agriculture Department (Crop Husbandry)-in hmathlir mumal tak neia hmalakna an kalpui thei chu lawmawm a ti a, ruahmanna an siam te chu ataka tipuitling turin Agriculture Officer-te chu a beisei thu a sawi a. Buh leh bal thar chhuah a lo pun zel theihna tur chuan kan hmanraw neihte a tangkai thei ang berin kan hmang tur a ni a ti. Pu Liansailova chuan Agriculture Officer-te chu fuihin loneitute nena inpumkhat lehzuala hma la zel turin leh loneitute chu an ngaihpawimawh ber tur an ni tih an hre chiang tur a ni a ti a, Department dangte nena thawhhona tha nei turin a chah bawk. Heng bakah hian an hlawhtlinna hrang hrangte chu mipuite hmuha pho lang thiam turin a chah bawk.
He hunah hian Parliamentary Secretary, Pu K.S. Thanga pawhin thu sawiin Agriculture Department-in hmuh theiha hmasawnna a nei chu lawmawm a tih thu sawiin, tunhma leh tun hnaia miten Agriculture Department an en dan chu a danglam tawh a, hemi avang hian loneitute pawhin Agriculture-ah hian rinna an nghat ngam tawh a ni a ti. District Agriculture Officer-te pawh an hnathawha chiang ngam tur leh chhui chian dawl turin hna an thawk tur a ni a ti bawk.
He meeting-ah hian DAO te chuan Power Point hmangin an hmalakna hrang hrang an tarlang a, harsatna an tawhte sawihona hun tha tak an nei nghal bawk.
