Serchhip District NLUP Implementing Committee leh District Level NLUP Monitoring Committee te chuan Vawiin khan Serchhip DC's Meeting Room-ah Joint Meeting an nei a, he hun hi Pu K. Lianzuala, MLA, Chairman, District Level NLUP Monitoring Committee chuan a kaihruai a ni.

He thutkhawm ah hian Pu K. Lianzuala, MLA chuan thuhma sawiin NLUP chu sawrkar hnathawk kan nihna zawnah neitu rilru pu chunga hna thawh tul a tih thu leh khawtlang hruaitute pawhin he rilru hi an put a tul thu a sawi a, NLUP a hlawhtlin theihna tura hun leh tha, an theihna leh finna sengtu zawng zawngte chungah leh DC Office-a thawktute bakah District Committee a Member leh thawktu dangte chuan fak an phu hle nia a hriat thu sawiin, an hmalakna ah lawmthu a sawi bawk.

Vawiin a thutkhawm ah hian NLUP Line Department 8 ten NLUP 1st Phase-a an hmalak dan leh NLUP 2nd Phase-a hma an lak tawh dan leh an hmachhawp te an tarlang a, boruak tha tak hnuaiah sawihona an nei nghal bawk. Hei bakah hian NLUP Beneficiaries ten harsatna an neih te sutkian dan tur sawihona neih a ni bawk a, zawhna awm hrang hrangte pawh Line Department leh sawrkar Official ten an chhang nghal bawk a ni.

Serchhip District chhungah hian Cluster 3 awmin heng Cluster 3 huamchhungah hian NLUP 1st Phase-ah Beneficiaries 1074 an awm a, heng mite hi tanpuina pekchhuah tawh an niin Line Department thenkhat chuan Beneficieries thenkhat chu tanpuina an pek tur ang te an pechhuak zo tawh bawk a, NLUP Beneficieries 17 te chu hma an lak thatloh avangin tanpuina pek chhunzawm an nilo thung a ni.

Vawiin thutkhawm ah hian Serchhip District Bawrhsap, Pu Lalsangliana, NLUP Nodal Oficer, Pu Robert C. Lalhmangaiha, NLUP Line Department tin Oficer leh heng Committee pahnih a Member te an tel tha hle a ni.