Aizawl Municipal Council hnathawh thlirletna ‘performance review committee’ neiin vawiin tlai khan UD&PA Minister Pu Zodintluanga hovin a pisaah sorkar mi pawimawhte an thukhawm.

India danpui 12th schedule in urban local body-te tihtur a tuk 18 zinga 8 -Urban Planning; in sak chungchang;  mipui hriselna ngaihtuah leh khawpui vawn fai chungchang;  slum area tihhmasawn;  khawpui chhunga miretheite hmasawnna ngaihtuah; thlanmual ram, mitthi phum leh hal ral (cremate) chungchang; vantlang mamawh street light, parking lot, bus stand leh a dangte bakah khawpui chhung mipuite khawsak phung tihhmasawn leh ei leh bara intodelhna ngaihtuah te chu tun dinhmunah AMC kutah dah a ni a. A bak 10 te hi AMC hnenah pek theih dan kawng zawn nise tiin meeting chuan a rel a. AMC nodal department UD&PA chuan a mawh la in heng mawhphurhna dang 10 enkawltu Department hrang hrang te a dawr dawn a ni.

AMC huam chhunga Local Council thar din chungchangah dan siam that tul nia an hriatte sawi hovin a tul anga siamthat ni se, an ti a. Local Council thar siam belh a nihin sum tam tak senso belh ngai leh thil pawimawh dang kaihhnawih a ngah avangin Local Council thar siam dawna zawm ngei tur tehkhawng mumal siam tha in an hria a. He dan hi Law & Judicial Department lo enzui tura buatsaih a ni ang.

Kum 2015-a AMC Councillor inthlanna neih tur thlir lawkin Mizoram Municipalities Act siamthat ngai laite siam that turin meeting hian a rel a ni.

Meeting-ah hian UD&PA Secretary Dr. C.Vanlalramsanga, AMC CEO Pi M.Zohmingthangi, UD&PA Addl.Secretary Pu H.Laizika, UD&PA Director Pu Zorammuana bakah UD&PA leh AMC atangin official engemawzat an tel a ni.