Home Minister Pu R. Lalzirliana chuan Government Higher Secondary School, Saitual ah MZP Hqtrs, Saitual in an bial huam chhunga HSLC leh HSSLC  result hlawhtling neitu zirlai te tana lawmpuina a buatsaihna ah Mizo zirlai ten lehkhathiamna chauh neih tuma tan an lak palh chuan Mizo nun ze mawi an hlauh ang tih a hlauh thawn thu a sawi a. Mizo zirlai te tan chuan lehkha zirna bakah zonunmawi an zir tel a ngai a ni a ti.

A sawi zel na ah tlawmngaihna nei, aia upate zah nachang hria leh chhumchhiate tanpuina kawnga mawng zang nih hmanlai Mizo naupang te chuan an tum tlat thin a. Kha nun mawi taka kha tunlai naupang te hian zirlai an nih chhunga an tih theih leh an tih atana thil mawi tak a ni a ti. Eizawnna kawng hrang hrangah lehkhathiamna a pawimawh vek tawh a, pawl sawnna ringawt thiamna erawh a chhawrtlak tawhlo mai nilovin khawi hmun pawha hlawhtling tur chuan export quality tih theih khawpa thiamna nghet a pawimawh tawh a ti. Thiamna tak nei silova degree neih hi thil mawi pawh a ni lova, chutiang ang mi chuan an hna dil te an hmuh lohvin mak tak tak in sawrkar mawhchhiat an ching leh tlat thin a. Sawrkar in a duhsak zawng chiah hna ah thun te diklo takin an ti mai thin hi thil pawi tak a ni  a. Sawrkar chuan a thiam thiam a lak thu leh engemaw avanga duhsakna hleihluak taka hmanga sawrkar hna pek a nei lo a ti. Tunlai Mizoram vantlang rilru a sawina ah Kan khawhawi ti zau tur leh hnam changkang zawk te rilru pu tur chuan kan chiar zau tawk lo nia a lan thu a sawi a. Tuna zirlai te hi chuan an zirlai bakah thuziak a tam thei ang berin chhiar se thil dik leh diklo then hran dan pawh an lo thiam tawh zawk nia a rin thu leh vantlang ngaihdan hrisel(healthy public opinion) pawh a awm thei zawka a rin thu a tarlang. Kan Mizo thalai chhuanvawr zingah hnamdang nupui/pasal atan neih tha tihna rilru nei an awm thin chu thil vanduaithlak tak, Mizo hnam hmangaihtu tana thinlung natna leh hnam anga zuih ralna a nih avangin kan sim ngei ngei tur nia a ngaih  a thu sawi a. Mizo hnathlak tam tak zingah hian nupui/pasal atan duhthlan tur tam tak an awm ngei anga zo hnam peng hrang hrang te hi inneih pawlh ching zawk ila hnamdang ngaihsan ai chuan Mizo hnam tan a tha zawkin a rinawm a ni a ti.

Zirlai titha te chawimawina hun hi MZP Headquarters, Saitual a hruaitu ten kaihruaiin MZP General Headquaters lam hruaitute pawhin an tawiawm a ni.