Spastic Society of Mizoram (SSM) ina enkawl, Gilead Special School in an puala hmun nghet an neih theih avanga Pathian hnena lawmthu sawina hun Bawngkawn Brigade a an neihah Chief Minister Pu Lal Thanhawla chuan a hmanpui.

Chief Minister chuan Gilead Special School-in an mahni puala hmun nghet an nei thei ta chu a lawmpui hle a ni a ti a. Spastic Society of Mizoram hi rualbanlo te enkawlnaah Pathiana innghat chung zela an kal avangin Pathianin mal a sawm a ni a ti a. Ringtu kan ni a, kan awmna apiang hi Pathianin a rawngbawl tura min dahna a ni a, tui taka thawk tur kan ni a. Midangte tana malsawmna ni turin kan thawh angai a ni a ti.

Spastic Society enkawl rualbanlote hi Pathianin a duh taka a siam, A vohbikte an ni a ti a. Kan chunga thil thleng reng reng hi Pathianin kan chungah engemaw tih duh a neih thin vang a ni a ti a. Sorkar-in hmun nghet tur a pekah Spastic Society-in lawmnachang an hria chu Pathian duh zawng a ni a, Pathian duhsakna pawh an dawng chho a ni a ti. School leh naupangte enkawltu zawng zawngte inpekna ropui tiin, an hnathawhah an fakawm tak zet a ni a ti.

Pu Lal Dingliana, IFS (Rtd), Chief Information Commissioner pawhin thu sawiin, SSM in hmun nghet an nei chu a lawmpui thu a sawi a. Gilead Schoola rualbanlo naupangte ang hian amah pawhin rualbanlo fapa a neih ve sawiin, a fapa rualbanlohna chu ‘autism’, (‘autistic’ pawh an ti) a ni a ti a. Neihbawia a ram cheibawl tawh, intihhlimna hrang hrang awmte chu SSM in an duh anih chuan an hman theih tur thu a sawi a. Helai hmuna a fapa hming chawi a Building Rs.5 lakhs seng a sak chu autism chungchang bika enkawlnan a tih a nih thu a sawi bawk a ni.

Building sakte enkawla buaipuitu Dr.N. Pallai chuan sorkar ram pek hi 3.5 Bigha a zau a ni a ti a. Falkland a an school building thiatin, helaiah 2nd March 2015 atang khan building 7 sak a ni a. Class room 18 awmin, inthiarna 8 siam a ni bawk a. Hostel naupang 30 len theihna tur sak mek a ni bawk. SSM sum neih sa Rs.20,94,420/- atangin building saknan  hian Rs.19,22,824/- sen a ni.

SSM hi kum 1989 khan din a ni a, kum 25 an kal chhung hian Aizawl veng hrang hrang Chhinga Veng, Sikulpuikawn, Saron veng leh Falkland ah te an awmkual tawh thin a. School ah hian vocational centre pawh dah a ni a, tunah hian National Indira Gandhi Open School zawm thei tura hmalak mek a ni bawk. SSM hi CKTP in Rs.5 lakhs in tanpuina a pe a, AMC pawhin Rs.5 lakhs tanpuina a pe bawk a ni

Inkhawm hi Hostel tur sak mekah neih a ni a, SSM Chairperson Pi Zokhumi Vankung in a kaihruai a ni.