Vawiin khan Social Welfare Minister Dr.K.Beichhua hovin a pisaah Social Welfare Department hotuten  Anganwadi Worker hnathawk tha rampum huap chawimawina National Award dawngtu Pi Vanlalchhuangi, AWW, Kolasib AWC-XII Diakkawn lawmpuina hun an hmang.

Dr.K.Beichhua chuan mahni hna a tui, hlim taka thawk thin te hi mi entawntlak an ni, a ti a. Ministry din tirh phata chawimawi tlak chawimawi tur an nei chu Pathian malsawmna nia a hriat thu a sawi. Minister chuan Pi Vanlalchhuangi chu Social Welfare Department tana entawn tur role model ni thei se a duh thu sawiin National Award dawng vek thei kher lo mah se Pathian mit hmua lawm tlaka hna thawk theuh turin he Department a thawktute a chah a. Social Welfare Department chuan khawtlang nun (social life) zawng zawng a hawl kima, ram siam thatna kawngah mawhphurhna pawimawh tak an nei a ni, a ti. 

National Award dawng thei tur hian State chhunga Anganwadi Worker thawk tha mi panga thlan chhuah an ni a, heng zinga mi pathumte chu National Award dawng tura chhawp chhuah thin a ni a. National Award dawng thei tur mi pathum chhawp chhuah atang hian mi pakhat an lo thlang chhuak leh thin a ni.  Kum 1995 atanga sawrkar laipuiin a kalpui tan  Anganwadi hnathawk thate chawimawina hian pawisa fai cheng 50,000 leh chawimawina thu ziak a keng tel a. New Delhi-ah sawrkar laipui Women & Child Development Minister Pi Maneka Gandhi hova programme changtlung tak buatsaihah kumin January ni 7 khan he National Award hi sem a ni.

National Award dawngtu Pi Vanlalchhuangi lawmpuina programme buatsaihah hian Social Welfare Department Secretary Pi K.Vanlalrawni, Director Pi Laldikkimi leh officer dangte an tel.