No.2230/2021-2022

Aizawl, 15th September, 2021 : Vawiin khan Health Minister Dr. R. Lalthangliana hovin SAD Conference Hall, MINECO-ah Mizorama covid-19 hripui leng mek dona kawnga sawrkar hmalakna chi hrang hrang thlirho a ni.

Vawiin meetingah hian Dedicated COVID Hospital-Zoram Medical College (ZMC) hotute chuan ZMC a COVID-19 hri kai boralte dinhmun an sawi a, COVID-19 veite enkawlna ward 8 a khum awmte chu khat deuh reng mahse harsatna lian em em an tawk rih lova, ICU erawh a khat hneh hle a, ICU khum an inchanloh nasat avangin an lu a hai takzet tih an sawi a ni. An zirchiannaah ZMC-a COVID-19 vanga nunna chan zinga 55% hi kum 60 chunglam an ni a, kum 18 – 44 hi 23% niin, kum 45 – 60 hi 20% an ni. Nunna chan zinga 66 % hi mipa niin Aizawl khawpuia cheng hi 71.60% an ni.

ZMC-a COVID-19 hri kai boralte hi chawhrualin ni 11.65 damdawi in a enkawl an ni a, admit tirha symptom nei lo, a hnua nei ta nunna chan hi 7 % an ni. Nunna chante symptom neih langsar zual chu khawsik, thawhah, khuh ro, SPO2 hniam, kawthalo, chau, hrawkna leh taksa kham an ni a. Natna benvawn nei hi 80% an ni. Nunna chan zinga 76% hi positive an ni tih hriatchhuah atannga ni 5 chhunga admit an jni a, heng zinga 55% hi positive an ni tih hriatchhuah ni la la a admit an ni. COVID-19 hri kai nunna chante hi hri kai hmuhchhuah atanga 0.33% an nih lain India ram (national) average hi 1.33% a ni thung. Vawiin meetingah hian COVID-19 dona kawnga hmalakna hrang hrang sawiho niin rawtna chi hrang hrang siam a ni a, Containment Zone ruahman chungchang leh restricted area kalpui dan chungchangte pawh sawiho niin, sample test kalpui mek danah ngaihdan leh rawtna hrang hrang ngaihthlak a ni a, ZMC-a ICU tihlen chungchangte, hrikaite enkawl dan (treatment protocol) chungchangte sawiho a ni bawk.

Vawiin meetingah hian MOT Chairman Dr. ZR Thiamsanga, MLA, Health Secretary Pu R. Lalramnghaka bakah Health Department hotuliante an tel a, Aizawl Civil Hospital hotute, Association of Physician, Indian Medical Association, Mizoram Government Doctors’ Association leh Medical Operational Team on COVID-19 aiawhte an tel a ni.