Mizoram sorkar thara Public Health Engineering (PHE) Department enkawltu Minister Pu Zodintluanga leh Parliamentary Secretary Pu Hmingdailova Khiangte te chuan vawiin khan Secretariat Conference Hall, New Secretariat Complex-ah PHE hnuaia hotu pawimawh hrang hrangte kumthar thingpui in puiin thu pawimawh tak tak an rel.
Minister chuan ram leh mipuite rawngbawl tura dah an nih angin hmasawnna tur hmalakna hrang hrang duang chhuak leh tihlawhtling turin thawktute tawiawmna a ngen a. Khawvel changkang zelah kal dan ngai renga kal lova, mipuite tana malsawmna a nih dawn phawt chuan thil inthlakthleng leh kal danphung thar neih a tul chang a awm dawn tiin langtlang leh inpawhtlang taka hnathawh puiah department officer-te a sawm a. An thawhhona rah tha chu Zoram mipuiin an seng ngei tur a ni, Minister chuan a ti bawk.
Pu Hmingdailova Khiangte pawhin PHE hotute fuihin hlawhtling tur chuan hmangaihna tela hnathawh a pawimawh ber a ni, a ti.
Meeting-ah hian PHE Minister chuan a ngaihpawimawh zual thil pathum sawi chhuakin Aizawl khawpuiah mipuiin tui hnianghnar taka an dawn theih nan kar khatah vawi hnih tal tui sem theih dan kawng dap a tul thu te, mipui punkhawm tamna hmun bus stand-ah te leh hmun remchang dang dangah tui in tur thianghlim (safe drinking water) a thlawna awlsam taka mipuiin an herhchhuah mai theih tur dah te leh PHE in tui an lakna Tlawng lui dung hmun thenkhatah sangha humhalhna hmun bik siama mipui a duh apiangin an tlawh theih tura dahte a tel a ni.
