Vawiin chawhnu khan Public Works Department changtu Minister Pu Lal Thanzara hovin Engineer-In-Chief’s Conference Hall, Tuikhuahtlangah Public Works Department (PWD)-a thawkten an hnathawhte thlirletna (Review Meeting of Works) an nei a. Review meeting hi ni hnih January Ni 18-19, 2018 chhunga neih a ni ang.
PWD Minister Pu Lal Thanzara chuan thu sawiin nikumah kum dang zawng aia nasa in ruahtui a tam a, chu chuan department hnathawh pawh a ti khaihlak hle a ni, a ti a. Thawhhona tha chuan hnathawh pawh a ti sawt zawk a ni tiin kalkhawmte hnenah chuan in thiamnate in hman tangkai a ngai a ni, a ti a. Hmun hrang hranga PWD hnathawhna kawnga harsatnate Minister chuan sawiin heng harsatna chin fel a nih theih dan te a tarlang a. Tui luanna tur tha neih a pawimawh thu sawiin tui luanna tur bawlhhlawh leh thil dangin a hnawh khat thin chu titawp tura tan lak a ngai a ni, a ti a. Kawngpui tha siam pawhin tui luanna ber tur a awm that loh chuan kawngpui pawh a tha rei thei lo a ni, a ti a. Kawng chhelai thuamthat chungchangah pawh a rang thei ang bera hnathawk turin a chah a. Social Media chak tak kan neih hi department hmalakna hrang hrang mipui vantlangin an hriat theih nan hman theih a ni tiin mipui lam atanga zawhna awm te hrilhfiahna atan kan hmang thei bawk a ni, a ti a. Thahnemngai taka hnathawk turin kalkhawmte chu a fuih bawk a ni.
PWD Principal Secretary Pu Lalram Thanga, IFS chuan kalkhawmte lawmna thu a sawi a. Kumin 2018 hi inpekna thar nen kum bul tan I tum ang u tiin a hun taka office kal leh haw pawimawhna I hre thar leh theuh ang u, a ti a. Meeting-a kan rel te hi kan bawhzui tha tur a ni tiin work site tlawh leh inspection kan uar a ngai a ni, a ti a. Engineer-In-Chief Pu R. Vanlaltluanga pawhin tan la thar turin kalhawmte fuihna thu a sawi a ni.
Vawiin Ni hian PWD hnuaia Highways bik hnathawh enletna leh hmalaknate sawihona neih niin naktukah hian Roads leh Buildings hnuaia hnathawhte thlirletna neih a ni dawn a. Vawiin Meeting-ah hian Engineer-In-Chief, Chief Engineer-te, Chief Architect leh a hnuaia thawkte, District hrang hranga S.E, E.E leh A.E leh hnathawktu dangte bakah PWD hnuaia Accounts lam hotute an tel a, an vaiin mi 98 an ni.
PWD hnuaiah hian kawng enkawl mek 6127 km, Lei 127 leh Building 1236 (3098 Units) a awm a. Kawng laih mek 1140 km, Lei dawh lai 9 leh In sak mek 58 a awm a ni.
