Chief Minister Pu Lal Thanhawla chuan Mizoram Ministerial Service Association (MMSA) General Conference cum Election chu vawiin khan Lal Thanhawla Auditorium-ah khuallian niin a hmanpui. Khuallian hi Pu Lalrinmawia Ralte, Political Adviser to CM in a tawiawm a ni.

Chief Minister chuan sawrkar hnathawkte chu mipui rawngbawltu an nih angin mipui tan leh anmahni dawrtute tan dawr nuam taka awm tura chah in, sawrkar langtlang leh thawk tha siam turin rinawmna, dikna, taimakna leh Pathian tihna nen mahni hna theuhvah thawk turin kalkhawmte chu a chah a. Rawngbawltu rilru pu a hnathawkte chu sawrkar leh mipui tana tangkai ber an nih thu sawiin, tunlai khawvel changkang chho zelah hnathawh naa computer thiam a pawimawh chhoh tak em avangin a thiamlo te pawhin thawktu hmantlakloh an nih mai loh nan inzir ve a intahhriam tum tura a duh thu te khuallian hian a sawi a. Hnam kalphungah chhiatni thatni a intawiawm thin kan ni a, heihi a thlamuanthlak rualin sawrkar hnathawkte chu kan phungthlukna hian kan hna tihthuanawp lo se, tiin Chief Minister chuan sawrkar hnathawkte chu an mizia ah emaw, an inthuamna ah emaw, an tawngkam leh nunphungah midang tan entawntlak ni theuh turin a sawm a. Hnathawhnaah record vawn fimkhur pawimawhzia te tarlangin, kan sulhnu chhui hi nakin zelah pawh a awlsam tur a ni, a ti a. Sawrkar hnathawk tan political party tan bik neih emaw, mahni tan lam lanchhuah tir a fuh loh thu a sawi bawk.

Chief Minister chuan GSDP ah India rama titha ber state zinga Mizoram a tel ve chu political leadership vang nilovin sawrkar hnathawktu te ber atanga lian berte inpekna vang a nih thu a sawi a; sawrkar hnathawkte hmakhua Sawrkarin a ngaihsak thu Chief Minister hian sawiin, thawktu thenkhat zingah ngaihtuahna leh remhriatna tha tak tak nei, an thiamna leh hlawh phu tawka hna thawk tura an hotuten an chhawr si loh an awm tih a hriat thu te sawiin, hmasawnna tur a nih chuan kalphung thlak thiam zel pawimawh thu a sawi a ni.

MMSA General Conference hi an President Pu Lalremsiama chuan kaihruaiin, an Vice President Pu Lalnghinglova kaihhruaiin mahni hnaa rinawm leh tha taka thawk tura thu intiamna sawiho a ni a; Kum 2016 leh 2017 chhunga an member boral ta 11 sunna hun neih a ni bawk. Mizoram Journalist Association kaihhruaina hnuaiah hruaitu thar tur MMSA member te hian an thlang a. Chawhnu lamah Pu T. Ronghinglova, Sr. Vice President kaihhruaiin rorel chhunzawm a ni a. An thu rel zingah Assistant leh LDC hlawh tihsan nawr chhunzawm te, MMSA hnuaia service hrang hrangte Non-functional upgradation pek chungchang leh sawrkar hnathawk hlawh chungchanga sawrkar hnathawkte hmuh diklohna awm fo chu sawifiahna tihchhuah chungchangte a tel a ni.