Sawrkar Laipui ruahman anga kum tina hman thin Road Safety Week vawi 26-na hman dan tur chungchang ngaihtuahin vawiin chhun khan Transport Minister Pu John Rotluangliana office chamber ah State Level Road Safety Council an thukhawm a. Kawngpui leh motor khalh him zawkna tura Road Safety Week hlawhtling taka hman a nih theih nan hmalak dan tur te an rel.
State Level Road Safety Council chuan Mizoram ah kum tina motor chetsualna avanga thihna thleng pung chho zel chu ngaihmawhawm tiin fimkhur leh him zawka motor khalh inzirtir uar deuh deuh tul a ti hle a. Kumin ah pawh hemi kawnga inzirtir tharlehna atan Road Safety Week chu ni 9-13 February, 2015 chhung hian SLRSC chuan hman a rel a, a hawnna pawh ni 9 February 2015 ah Vanapa Hall ah hman ni se an ti. Hemi pual hian zau zawka mipui inhrilhhriat nan Transport Minister chuan Road Safety thuchah siamin TV ah te chhuah ni se, Road Safety Week hmingin Car Flag siam ni se tih leh Week hawn ni hian Aizawl khawpui veng tinah motor khalh fimkhur tura inzirtirna thu tlangau mike ah puang tura ngen ni se tih te an rel a, road safety chungchanga hriat tur pawimawh tarlanna lehkha te siamin zau taka semchhuah ni se tih te an rel bawk a ni. Kumin Road Safety Week thupui atan ram puma hman angin “Himna chungchang hi sawi satliah mai lovin i nunpui tlat ang u” tih hman a ni dawn a ni.
Motor chetsualna avanga thihna tam tak thleng thin ven nan United Nations General Assembly chuan kum 2011-2020 chhung chu Decade of Action for Road Safety ah a lo puang tawh a, chumi tihhlawhtlin nana India ram pawhin kawng hrang hranga hmalak a tum thu leh State tin te theihtawp chhuaha bawhzui theuh tura ngenna Pu Nitin Gadkari, Union Minister of Road Transport hnen atanga a dawn thu Minister chuan a tarlang a. UN ruahman ang chuan motor chetsualna avanga thihna chu kum 2020 ah chuan 50%-a tihtlem tum a ni. Khawvel pumah motor chetsualna atangin kum tin mi 13,00,000 an thi a, India ramah chuan 1,38,000 niin Mizoram bikah chuan nikum 2014 khan chhinchhiah chinah motor accident 132 thlengin mi 234 an boral phah a, hliam 103 an awm bawk a ni.
