Vawiin khan Finance Minister Pu Lalsawta, Planning & Programme Implementation Department enkawltu Minister ni bawk chuan a Office Chamber ah Directorate of Economics & Statistics buatsaih ‘Statistical Handbook Mizoram 2014’ a tlangzarh.
Pu Lalsawta chuan inrelbawlna leh hmasawnna kawngah statistics chuan dinhmun pawimawh tak a luah a, inrelbawlna leh hmasawnna hi statistics chuan a ti phuisui a chuvangin statistical data reng reng a dik tak kan lakkhawm leh vawn that a tul a ni, a ti. Directorate of Economics & Statistics chu Department lian nilo mahse an hnathawh a pawimawh thusawiin Minister chuan Sawrkar Department leh mipuiten he lehkhabu hi tangkai taka an hman a beisei thu a sawi bawk.
He lehkhabu tlangzarhna ah hian Planning & Programme Implementation Department Secretary Dr. C. Vanlalramsanga, IES; Special Secretary Pi Nandini Paliwal IAS; Economics & Statistics Department Director Pu Vanlalrema leh a thawhpui officer thahnem tak an tel a ni.
Statistical Handbook Mizoram 2014 hi bu khat cheng 50 man miin naktuk atang hian Directorate of Economics & Statistics, Nursery Veng ah a lei thei dawn a, District Headquarters dangah chuan February ni 2 atangin a lei theih ang.
