No.4316/2021-2022

Aizawl, the 17th March 2022 : Vawiin khan School Education Complex Conference Hall-ah School Education Minister Pu Lalchhandama Ralte hovin Samagra Shiksha Annual Work Plan & Budget 2022-23 chu thlirho a ni. 

Minister chuan he hunah hian thusawiin Mizoram zirnaah Samagra Shiksha  hian chanvo pawimawh tak a chang a ni a ti a.  Thawktute zawng zawng chu an kova tla leh mawhphurhnate țha taka hlen chhuak turin a sawm. Minister chuan Data rintlak neih a țul thu te, data lakkhawmah field-a thawktute infuih țhat a țul thute, kum hnih chhung zet sikul a kal theih loh avangin naupangte chu sikul an luh țantirhah zirlaibu luhchilh nghal ngawt lova chawlhkar hnih vel chu naupangte tih tlangnelna tur programme school-in an siam a țul thu te a sawi a. Covid-19 laka inven dan chungchang te pawh naupangin an hriat theih nan school-ah inzirtir zui a țul thu a sawi bawk. 

Pu L.Thangmawia, Vice Chairman, HRD Board pawhin thusawiin School Education Minister kaihhruaina hnuaiah HRD Board pawhin hna țha taka a thawk theih dan te a sawi a,  thawhhona a țha a, innawr buai lutuk si lova an thawk thei hi a lawmawm hle a ni a ti bawk. 

Annual Work Plan & Budget thlirhonaah hian Science leh Mathematics zirlaibute chu Class IX-XII  thlengin naupangin Mizo țawnga an hriat thiam theih nan țawng pahnih English leh Mizo țawng hmanga ziah tum anih dan te, Class IX zirlaibu ațanga zir țan tum anih thu te, MBSE-in hma an lak dan te sawi a ni a, Primary ațanga zirna kal chho zelah Higher Secondary School mamawhna a len thu te sawi a ni a,  zirna sikul  tihchangtlunna tur leh mamawh plan-a telhte chu Minister-ho hian thlirho a ni.

Samagra Shiksha hian Pre school ațanga Higher Secondary school thleng a huam a, SCERT hnuaia DIET te a huam bawk. 

 Annual Work Plan & Budget thlirhonaah hian Pu L.Thangmawia Vice Chairman HRD Board, Secretary Pu Lalzirmawia Chhangte, School Education Director Pu James Lalrinchhana te bakah MBSE Chairman leh Secretary te, SCERT Director te, School Education Department Officer leh Samagra Shiksha State Project Director leh officer te an tel a ni.