Tunhnaia UD&PA Department leh SIPMIU ten ram pum huap inelnaa SKOCH Award an dawn chu vawiin chhun khan UD&PA Minister Pu Zodintluanga hovin ama office chamber ah a lawmna neih a ni.

Ni 10-11 December, 2015 chhung khan Indian Habitat Centre, New Delhi-ah 42nd SKOCH Summit neih niin SKOCH Technology Award 2015 sem a ni a, he Award atan hian institutions, organisations leh private sectors 1000 chuang ten inelna neiin Mizoram UD&PA Department chu ‘Sanitation through Public Participation in Mizoram’ tih thupui hmangin leh SIPMIU chu ‘North Eastern Region Capital Cities Development Investment Programme (NERCCDIP)’ tih thupui hmangin an tel ve a, anni pahnih hi a tha 50 thlan chhuah zingah telin SKOCH Award an dawng a ni. He Summit ah hian UD&PA Department chuan an hnathawhte tarlanna an nei nghal bawk a, he SKOCH Award hi Mizoram atanga dawng hmasa ber leh awm chhun an ni.

Sanitation through Public Participation in Mizoram - He Award hi Mizoram mipuite hian faina leh thianghlimna kan duh avanga, tlawmngaia hnatlanga veng tihfai hna, mi zawng zawngin kan thawh thin avangin ‘Sanitation through Public Participation in Mizoram’ kawnga titha lawmman UD&PA chuan a dawng a ni.

Minister chuan UD&PA Department leh SIPMIU hotute leh staff te thawhhona tha tak leh mipui te tanrualna avanga he lawmman hi dawng kan ni tiin mawhphurtu te inpekna leh thawhrimna ah lawmthu a sawi a, Mizo khawtlang nun inenkawlna tha tak zar kan zo tlang a ni, a ti. UD&PA department chu mipui tana awm leh thawk a nih ang taka mipui te chhawr theih tura hma an lakna ah lawmawm tiin mipui te duhdan leh hmathlir tihhlawhtling tura an hmalak chhoh zelna turah theihtawp chhuah chhunzawm zel turin thawktute chu a chah bawk.

Vawiin SKOCH Award lawmna ah hian UD&PA Secretary Dr C.Vanlalramsanga, SIPMIU Project Director Er Valbuanga leh UD&PA hotute an tel a ni.

Attachment

  • Loading attachment...