Vawiin khan Excise & Narcotic Commissioner Room-ah Pu R. Lalzirliana, Excise Minister chuan Drugs dona kawnga duty laia misual kut tuara thi Pu F. Zatluanga, Driver Grade I, Excise Department a thawk nupui Pi C. Lalsangluri hnenah Mizoram sorkar atanga zangnadawmna (Ex- Gratia) Rs. 10,00,000/-(Cheng nuai sawm) a hlan . He hunah hian Parliamentary Secretary Col. Z.S. Zuala; Pu K. Lalrinthanga, Parliamentary Secretary leh Department hotute bakah Pu F. Zatluanga chhungte an tel a ni.
Kan nunna hi sum leh pai a thleng dawn ralah chuan thleng phal chi a ni lo a. Vawiina programme ang pawh hi thil tih chakawm loh tak mahse hlu tak si a ni tiin Pu R. Lalzirliana chuan Pu F. Zatluanga’n ram leh hnam, department tan a duty hlena a nunna a hlan hi a ngaihsan awm in a chhuanawm a. Rinawm taka a duty a nunna chan phah hiala a awm hi kan ngaisanga kan chhuang takzet a ni, thihna rau rauah chuan ram leh hnam leh mi tena an hriatreng tur hetiang Martar na hi a hlu a ni, tia sawiin Pu F. Zatluanga nupui fanau leh chhungte a tuarpui takzet thu leh sorkar pawhin a a ngaisangin a hre reng tawh dawn a ni a ti.
Excise Department hi a lian lova, a thawktute rinawm leh dik a pawimawh chho zel dawn a. Ram hmasawn zelah sum lam te pawh khawihin an hma a zau chho dawn hle a ni tiin Excise Minister chuan rinawm leh dik taka thawk lo te chu dim hauh lovin dan anga hrem zel tur an ni a. Sum tam tak aiin hmingthat a pawimawh zawk tih Pathian thu in a sawi kha hriat reng a tul a ni, a ti bawk.
Col Z.S. Zuala, Parliamentary Secretary pawhin thusawiin Excise department hi lian lo tak ni mahse hna an thawk reng tih a hriat a. Ruihtheih thil leh sorkar phal loh zawng man an nei reng thin tih hriat tur awm a fo te hi an fakawmin an thawhrimna a lang hle a ni a ti a. Nasa zawka tang lehzual tur leh Krismas leh Kumthar kan hmachhawn mek ah pawh theih tawp chhuah zel turin a ngen a ni.
Pu Lalhmunsanga, Excise Commissioner Programme kaihruaitu chuan Pu F. Zatluanga hi pa fel leh tha tak zan lamah night duty a neih hnuah pawh zingah tawngtai inkhawmah te kal thin a niin pa tlawmngai tak a nih thu a sawi a. He hunah hian Principal Secretary Pu P.C. Lawmsanga leh Pu F. Zatluanga chhungten thu an sawi bawk a ni.
Mizoram Sorkar-in zangnadawmna a pek, Pu F. Zatluanga hian 9th September, 1988 khan Driver Grade III in Excise Department hi a zawm a. 11th February, 2014 zana Lunglei Rahsi vengah Excise officer hova an duty laiin misual kuttuara thi in a nunna a hlan a ni.
