Vawiin khan District Agriculture Office, Kolasib, Conference Hall-ah NLUP 2^nd Phase hnuaia Wet Rice Cultivation II beneficiaries mi 57 te hnenah tanpuina sum, final installment Rs. 20,000 theuh hlan an ni a. NLUP semna hi Kolasib DC Pu H. Lalengmawia, IAS leh Dr. C. Lalzarliana, Director of Agriculture(Crop Husbandry) ten an hmanpui a ni.

Pu H. Lalengmawia chuan Kolasib District chu District dang ngaihtuahin remchang a nei tha zawka, a ram a rual remin inkalpawhna te pawh a tha a, chuvangin Kolasib District a loneitu te chu Mizoram hmun danga kuthnathawktu te tan entawntlak model in ni thei a, chumi atan chuan theitawp chhuahin hma la turin ka duh che u a ni, ti a. Hlawhtlinna leh hlawhchhamna chu rilru put hmang avang a ni fo a, kan hlawhtlinna chu keimahni avang a ni tih kan pawm leh sawi angin kan hlawhchhamna te pawh midang mawhpuh lova keimah avang tho anih tih kan pawm a ngai a ni a ti a.  NLUP dawngtu te chu a dik thei ang berin leh a hlawk thei ang berin an tanpuina dawn chu hmang turah chahin NLUP dawngtu te chu Sawrkar duhdan leh kaihhruaina anga an tanpuina dawn an hman chuan an hlawhtlin ngei a rin thu a sawi bawk.

Dr. C. Lalzarliana chuan NLUP tobul leh a bul tan dan te sawiin NLUP hi chhungkua intunnun nana bultanna tur a ni a, chuvangin a dawngtu te hian tih tak zeta kan thawh leh kan hma lak a ngai a ni a ti a.  Hun lokal zel turah NLUP anga huap zau leh huapzo project hi dilchhuah leh siam a harsat a rin thusawiin NLUP hi ka ta a ni tia, a hlawhtlinna chu ka mimal hlawhtlinna a ni tih rilru pu a,  theitawpa tan kan lak a ngai a ni a ti bawk.

Vawiin NLUP semna hi District Agricultural Officer (DAO) Pu R. Lalnunzira'n a kaihruaiin he hunah hian Oil palm hlawhtlinna documentary film en ho nghal a ni. Tunah tumah NLUP dawngtu hi tlangram buhchinna hmun WRC II siamtu niin a dawngtu hi Kolasib atangin mi 17 leh Kawnpui atangin mi 40 te an ni.

Chawhnu lamah khan Oil palm lamah hma la tha te tan Oil Palm Production Incentive semna hun neih a ni leh a, oil palm chingtu mi 264 hnenah an tam thar danah zirin sumfai hlan an ni a. Metric tonne 100 leh 200 inkar thar hnenah cheng 10,000 zel; metric tonne 20 leh 100 inkar thar hnenah cheng 5000 zel leh metric tonne 20 hnuailam thar tan cheng 3500 zel Production Incentive an hlan a ni. Oil Palm documentary Oil palm titi pawh he hunah hian tlangzarh nghal a ni.

Kolasib District ah hian khaw 35 ah oil palm hi chin mek niin 2005 atang khan a chingtu mi 1850 vel an awm a, ram hectare 6458 a zau vel hi oil palm chin nan hman mek a ni a. Oil palm rah Fresh Fruit Bunch (FFB) hi April 2010 leh November 2015 inkar khan metric tonne 5429.262 tharchhuah a ni a. Kumin April leh November inkar khan oil palm rah metric tonne 1586.342, cheng nuai 87.25 man hu tharchhuah a ni.

Agriculture Department hnuaia Kolasib District chhunga NLUP 1st Phase atanga 4th Phase ah hian beneficiaries 1778 an awm mek a, chungte chu WRC I ah 446; WRC II ah 326; Oil Palm ah 956 leh Fu hmun siamtu 50 te an ni.