Vawiin chawhnu khan Chaltlang Tourist Lodge-ah Aizawl District Football Association(ADFA) General body meeting -2014 neih a ni a. He hunah hian Health Minister Pu Lal Thanzara, Mizoram Football Association a President ni bawk chu khuallian ah a hman a ni.
Pu Lal Thanzara chuan ADFA leh district FA zawng zawngte an chak loh chuan MFA a chak thei dawn lo a ni tiin District FA te pawimawhna a sawi a. Mizoram pawna Football khelh atanga eizawng leh chhungkaw chawm mi 400 chuang lai mai an lo awm theihna te leh Mizoram in footlball hmanga North East leh All India a champion nihna an hauh theih chhan chu sawrkarin infiamna khawvel ah thalaite khawvel thar a siam sak vangte leh hruaitu hmasate inpekna rah a ni a ti a. Thalai te pawn an vanneihna te hriain infiamna khawvel ah pawh thilropui tak ti zel tur leh ram leh hnam tihmingtha zel turin a chah a ni. Infiamna kawng hrang hrangah hma kan sawn mek lai hian Mizoram ah ruihhlo hlauhawm tak crystal meth, khehpuam damdawi mum atanga siam nia an sawi a rawn hluar tan mek niin an sawi a. He thil hlauhawm tak nunna suattu leh ram hmelma hian nasa taka Mizoram a tihchhiat hma in tihrem vat a ngai a. Sawrkar hmalakna ah mai duh tawk lovin infiammite leh an hruaitute pawh NGO-te thurualpuia he damdawi tha lovin thlalaite nun tam tak a suat lohna tura sawrkar a thawhpui tlat a ngai a ni a ti . Crystal Meth hlauhawmzia leh Mizoram ah pawh tawlh leh hralh ruk a nih thu te leh mipuite inven dan turte Mizoram a media ten an auchhuahpui thin a. Hei hi sawrkar chuan lawmawm a ti a, Health Minister a nih ang pawhin MJA member zawng zawngte chungah lawm thu a sawi a ni a ti.
ADFA meeting hi hun 2 ah then niin an Association President Pu Robert Romawia Royte in a kaihruai a.
ADFA sum dinhmun leh an hmalakna hrang hrangte tarlan a ni a. ADFA hian tun dinhmunah ah first Division Club 8, second division Club 8 leh third division club 57 a enkawl meka. Kum 2013-2014 chhunga an sum dinhmun pawh audit tawh niin Rs. 20,05,349/- an la lut a, Rs. 15,51,399/- hmang zo tawhin Rs.4,53,950/- an la kawl a ni.
