Art & Culture Minister Pu P.C.Zoram Sangliana chuan vawiin chhun khan ama Office Chamber ah Art & Culture Department website siam thar a hawng.

Minister chuan hawnna thu sawiin a duh apiangin an thlir theih tura Art & Culture Department dinhmun leh hnathawh dan te tarlanna department website hawn a ni thei chu lawmawm a tih thu a tarlang a. Tunlai khawvel chu IT khawvel a nih tawh avanga IT chungchang hriat ve chu mitin tan thil tul a nih tawh thu te a sawi lang bawk. Art & Culture Department website chuan an department din chhan leh thiltum ber te chiang takin tarlang se a duh thu a sawi bawk.

Website ah hian Art & Culture hmalakna te, programme leh chanchin thar te bakah thlalak hmuhnawm tak tak te tarlan a ni a, department buatsaih thin seminar-a mithiam te paper te pawh a duh apiang en theih tura thun tel tum a ni. Website ah hian Art & Culture Department enkawl Vanapa Hall, Archives, Multipurpose Cultural Centre Complex, Beraw etc. te hman dan leh dil dan te turte pawh dah tel vek a ni bawk a ni.

Website hawnna inkhawm hi Art & Culture Secretary Pu C.Thatkunga’n a kaihruai a, Director Pu Ngurbiaka’n website buatsaih chhoh dan te a sawifiah bawk. Website hawn thar domain hming hi www.zoculture.com a ni a, remchan zawkna avangin www.mizoculture.com ti-a thlak turin vawiin website hawnna ah hian an rel nghal bawk a ni.