Government Aizawl West College-in lut thar te lawmna (Freshers Induction 2014) vawiin Vanapa Hall-a an buatsaih chu Higher & Technical Education Minister Pu R.Romawia’n a hmanpui.

Minister chuan zirlaite hmaa thusawiin college zirlai te ningkhawng hriat a chak avanga hmanpui a nih thu a sawifiah a. Zirna tha leh thiamna an neih theih nan an nu leh pa ten theihtawpin hna an thawk a ni tih hre reng turin a chah. Lehkha thiam tamna ram apianga mi te an damchhung a rei bik tih sawiin Minister chuan lehkha thiam chuan a chhiar zau a, nun dan a thiam a, taksa tana thalo lakah a insum thei a, a nun a uluk bawk a, a hriselin a dam rei nge nge thin a ni, a ti. Mizoramah zu leh ruihtheih thilin thalai a suat nasa em em chu pawi tiin college zirlai te chuan an thiamna leh finna te tangkai taka hmang turin a fuih bawk.

Zirlai lut thar te lawmna thu tawi sawiin Principal Dr Laithanzauva chuan Aizawl West College chu ni 2 May 1990 ah din a nih thu a tarlang a, 2007 ah Mizoram Sorkar-in a provincialise a, tunah hian zirlai 817 leh Lecturer 36 an awm mek a, kumin hian seat 200 chauh nei chungin zirlai 454 an lak thar thu a sawifiah bawk.