Vawiin chawhma khan Hotel Regency Conference Hall ah Mizoram Tourism Department hmalakna in Ministry of Tourism, Government of India hotuten Bed & Breakfast Scheme nihphung leh he scheme hmanga khawpui leh thingtlang khua a chhungkua ten sum la lut a mikhual an thlen theih dan chungchang zirchianna a buatsaih. He hunah hian Pu Shreevats Sanjay, Regional Director (North East), Ministry of Tourism leh Pu K.Lalnghinglova, Commissioner &Secretary, Tourism Department ten Hotel neitute leh sawmbik te hnenah Bed & Breakfast scheme homestay kalpui tura dilna thehluh theih dan leh Tourism tih hmasawnna atan a tangkainate an sawi a ni.

Pu Shreevats Sanjay chuan India sawrkar in Tourism a hmalakna hnuaiah khawpui leh thingtlang kilkhawr ber bera in leh lo neitute chuan an in chhungah mikhual thlenna tur pindan te siam in ram pawn leh ram chhunga mikhual leh zin veivakte an thleng thei a ni a ti a. Mikhual te hian a thlengtute hnenah thlen man te an pe thung dawn a ni a ti a. He scheme hi tourism a phur mi tupawhin a hmang tangkai thei a ni a ti. Mikhual thleng thei tur erawh chuan Ministry Of Tourism Office, Asom Paryatan Bhavan, Paltan Bazar, Guwahati ah dilna form la chhuak a thehluh hmasak a ngai a. Dilna te hi pawmsak an nih hnuah heng thlen in te hi Gold leh Silver category ah te then a ni leh dawn a ni. Thlen man pawh a category a zira bituk sak a ni dawn a ni.He scheme chungchang hi Ministry of Tourism official website, www.tourism.gov.in ah zirchian theih in a awm a, telephone hmanga hrechiang duh tan 0361-2737556,2737553,2737554, 0385-2451131 ah te leh email hmanga zawt chiang duh tan sanjayshreevats@yahoo.com leh Indiatourism.imphal@gmail.com ah te biak pawh tur a ni.

Pu Shreevats Sanjay chuan Bed & Breakfast homestay scheme chu Mizoram economy tih chak nan a tangkai hle dawn a a hria thu sawiin North East India State tam zawk ah phei chuan khawpui leh thingtlanga chhungkaw tam tak ten eizawn nan an hmang mek a. Mikhualte hi a tlangpuiin Foreigner leh state pawn a mite an ni a ti a. Mikhualte thil duh ber chu an thlenna chhungkua khawsakzia leh vantlang nun te hriat chian theih nana tlangnel tak leh thlamuang taka thlen leh an ei leh in te tawmpui ve a ni a ti. Mikhual zawng zawng hian faina leh inthiarna thiang hlim te an beisei a, ei leh in ah phei chuan an hnawksak loh hle thu a sawi bawk. He scheme hnuaiah hian Chhungkaw khat in ah hian pindan 1 atang pindan 6 thleng a siam theih a. Heng pindan ah hian te khum 1 atanga khum 12 thleng an siam thei a. Inbualna leh inthiarna fai tak erawh heng room ah te hian a awm vek a ngai thung a ni. Sawrkar pawmpuina nei In neitute hian Marketing Development Assistance Programme (MDA) hnuaiah ram pawna tourism kutpui an tlawhna senso Rs. 2 lakh thleng sawrkarin a pe let leh thin a ni a ti.

Workshop ah hian Tourism Director Pu Vabeiha Hlycho, Pu V.Senthur kumaran, Assistant Director, Tourism Guwahati, Ministry of Tourism, Aizawl leh Mizoram hmun danga Hotel neitute leh sawm bik te an tel a ni.