Govt. Zirtiri Residential Science College ten lut thar te lawmna leh graduate thar te thlahna programme an buatsaih chu vawiin khan Vanapa Hall ah an hmang a, Labour, Employment & Industrial Training Minister Pu Lalrinmawia Ralte-in a hmanpui.

Minister chuan zirlai te fuihna thu sawiin tunlai hmanraw changkang tak tak kara cheng thalai te chuan eng ang takin nge an hman tangkai tih zawtin, infiamna leh intihhlimna ringawt atana tunlai technology hmang lova, inzir nan leh hmasawn nan, an lehkha zirlai leh hnathawhnaa puitu atana hmang tangkai thiam turin a chah. Mizo thalai lehkhathiam tam takin Mizoram ah vek hnathawh kan tum avanga hnu hmu lo an tam chu thalo tiin Zoram pawnlama eizawnna hna tha thawk tura vak chhuak ngam turin a fuih bawk. Mizo thalai lehkhathiam ten pawnlama hna an hmuh theih nan Sorkar chuan Vocational Training providers te hmanga training a buatsaih tawh atangin thalai engemawzat chuan hna tha tak tak an thawh mek thu te a tarlang a, college zirlaite chu midangte kaihruaitu leh kawhhmuhtu ah tang thin turin a ngen bawk. Hlawhtlinna hmu tur chuan taihmak leh thawhrim a tul tih hriaa, mahni inthunun tlat chunga zirlaite chu an thatlai hun hmang turin a chah bawk.