3781/2024-2025

Aizawl, 14^th January, 2025 : Vawiin khan Information & Public Relations Minister Dr. Vanlalthlana chuan I&PR  Department-a thawk zawng zawngte leh MJA member-te, Kumthar 2025 atana Inhlan tharna hun, I&PR Auditorium-ah a hmanpui.

Information & Public Relations Minster Dr. Vanlalthlana chuan I&PR Officers, Staff leh MJA member zawng zawngte kumthar chibai a buk a. Kum thar 2025 Pathianin min hruai thlen avangin lawmawm a tih thu sawiin, kum tharah rilru thar nen hmasawn tum tlang vek tura chahin khawvel a danglama, kan kum a lo danglam zel rual hian a tha lam zawngin danglam vek ang u a ti a. Ram hmasawnna tur leh khawtlang hmasawnna tur a sawrkar in ruahmanna a siam tipuitling turin theihtawp chhuaha tan lak puiah I&PR Department leh MJA member zawng zawngte a sawm a ni.

Minister chuan tunlai khawvelah technology a thang chak em em a, a bik takin social media ah mi tupawhin an duhdan leh ngaihdan te an puangchhuak thinin, thenkhat phei chuan content an duh luat tukah thudik a nih leh nih loh pawh thlu lovin, thlirtu/ngaithlatu an duh tam vangin a him leh him lo pawh thlifim lovin mipui rilru an hruai kawi nasa hle thin niin a lang a, journalistic ethics engmah awm lovin an duh duh an sawi mai thin a, hei hi kan vei a ngai a ni a ti a, Journalist te chuan mipui hnenah thudik leh rintlak, phuahchawp ni lo an hrilhhriat thin ang hi nasa lehzuala kan tih a ngai a, I&PR department nen tangkawpa theihtawp kan chhuah a ngai a ni a ti a. Ruihhlo Do kawngah theihtawpa tan lak a tul thu a sawi bawk a ni.

I&PR Secretary Pi Betsy Zothanpari Sailo pawhin thu sawina hun hmangin mihring theihna vang ni lovin Pathian kaihruaina kan dawn vanga tun hun thleng thei kan ni tih sawiin, I&PR Department leh MJA member ten thawhhona tha tak an neih chu chhunzawm zel pawimawh a tih thu a sawi a, mahni tanghma um lova Mizoram tana tha tur ber ngaihtuah chung zela thawk turin kalkhawmte a sawm a. Sawrkarin a chhawr sawrkar hnathawk zingah hna thawk tha duh lote chu an hna atanga chawlh tir turin thutlukna siam a ni tawh a, Review Committee pawh din a nih tawh avangin inthlahdah leh thatchhiat vanga mahni hna thawk tha duh lote chu dim an ni dawn lo tih a sawi. 

MJA President Pu C. Lalrambuatsaiha pawhin thu sawiin Minister hova I&PR Department leh MJAmember ten inhlan tharna hun hman a ni chu lawmawm a ti a. Press Tour buatsaih sak an nih thin bakah tunhnaia Mizoram Journalists Pension Scheme a taka kalpui  anih taka vanga lawmthu sawiin sawrkarin a theih ang anga journalist te a ngaih pawimawh thin avangin lawmthu a sawi a ni. MJA President hian MJAmember te leh I&PR Department a thawkte chu taksa hriselna vawng uluka in fit tak leh hrisel tha taka hna thawk turin duhsakna a hlan bawk a ni.