Art & Culuture Minister Pu PC Zoram Sangliana chuan nimin khan a chenna in Tuikhuahtlangah Young Men's Christian Association (YMCA) National Council Vice President a thlan tlin a nih avanga Pathian hnena lawmthu sawina hun an hmang.
Ram pum huap YMCA hruaitu inthlanna kum 33 zet kalpui a nih tawh loh hnuah kumin June 13 khan Vishakapatnam-ah khawmpuilian XXXIII Triennial Convention of the National Council of YMCAs hman a ni a, hetah hian ram pum huap hruaitu inthlanna neih a ni a. National Vice President pathum zinga pakhat ni turin Pu PC Zoram Sangliana chu hneh taka thlan tlin niin vote tla zawng zawng atanga chhutin za zela 62 a hmu a ni.
Khawvel hmun hrang hranga Kristian te, kohhran pawl inthliarna awm lova thawhhona, YMCA hi 1857 daih tawh khan India ramah pawh din a lo ni ve a. Hmarchhak bialah hian 1978 khan Shillong khawpuiah din niin Mizoramah pawh 1981 khan din a ni. Region hrang hrang pakua a thensawm niin Aizawl YMCA hi North East Region hnuaiah a awm. Pu PC Zoram Sangliana hian North Eastern Region YMCA Chairman nihna hi tunah hian a term hnihna a chelh meka, Aizawl YMCA President nihna hi 2009 atanga vawiin ni thlengin a la chelh bawk a ni. Tun dinhmunah Aizawl YMCA hian Life Member 171 an nei mek a, a duh apiang tan he pawl hi zawm theih a ni.
Pathian hnena lawmthu sawina programme hi Maj.Dr.ST Dula'n a kaihhruaia, Rev C.Chanchinmawia'n Pathian thuchah a sawi a, Aizawl YMCA aiawhin Honorary General Secretary Pu K Lalsawmvela'n thu a sawi bakah Minister Pu PC Zoram Sangliana leh a thiannu Pi Lalthlamuani ten lawmthu sawina hun an hmang bawk a ni.
