3355/2022-2023

Aizawl, 25th January, 2023 : Vawiin khan Co-operation minister Pu C. Lalrinsanga’n Mizoram Housing Cooperative Federation Ltd (HOUSEFED) pisa thar MIZOFED Head Office building, MINECO a mi chu a hawng.

Pisa hawnna inkhawmah khuallian Pu C. Lalrinsanga chuan HOUSEFED hun rei tak hnuah tihnun thar leh a ni chu lawmawm a tih thu sawiin an lakah beiseina sang tak a neih thu a sawi a, Cooperative movement pawimawhzia tarlangin tangkai taka kan hman thiam a ngai a, mipuite mamawh phuhruk kawngah Cooperative Society hrang hrang ten tun aia nasa lehzuala tan lak a ngai a ni a ti a. Cooperative movement tihchak kawnga society hrang hrangte an tanrual a pawimawh thu a sawi bawk a ni.

Khuallian chuan mipuite mamawh phuhruk kawngah Cooperative Society te an mit leh beng chhi uluk tura chahin hmathlir thui tak nei chunga hmalak a pawimawh thin tih a sawi a, a bik takin mi harsa leh retheite ngaihtuah reng chunga ruahmanna siam a pawimawh thin tih a sawi bawk a ni.

Khualzahawm Pu K. Laldawngliana, MLA, Commerce & Industrial Development Board Vice-Chairman pawhin HOUSEFED pisa thar luah theiha a awm ta chu lawmawm a tih thu sawiin phal taka luahtirtu MIZOFED chairman leh a thawhpuite chungah lawmthu a sawi bawk. HOUSEFED chu midangte tana malsawmna thlentu, a bik takin thingtlang lama mi rethei in nei lo te tana hlimna leh lawmna thlentu ni ngei turin duhsakna a hlan a ni.

HOUSEFED hi primary Multipurpose Copoerative Society 10 – Ramhlun Vengthar Multipurpose Cooperative Society, Ramhlun South Multipurpose Cooperative Society, Sihphir Multipurpose Cooperative Society, Sihphir Venghlun Multipurpose Cooperative Society, Sihphir Women Multipurpose Cooperative Society, Saron Veng Multipurpose Cooperative Society, Nursery Veng Multipurpose Cooperative Society, Luangmual Multipurpose Cooperative Society, MIZOFED Employees Multipurpose Cooperative Society leh Bawngsa Zuar Multipurpose Cooperative Society in an din a ni a, July ni 26, 2022 khan din niin November ni 25, 2022 khan registration certificate an nei a ni.

HOUSEFED Chairman hi Pu Lalzahawma Khiangte niin, Vice-Chairman chu Pu Ropiangliana a ni.

HOUSEFED pisa thar hawn inkhawm hi HOUSEFED Chairman Pu Lalzahawma Khiangte-in a kaihruai a, HOUSEFED Secretary Pu Lalzahawma’n report pein HOUSEFED BoD Pu Lalrinthanga’n lawmthu sawiin a khar a ni.

HOUSEFED pisa hawnnaah hian Mizoram chhunga Cooperative Society hrang hrang hotute an tel a ni.