3354/2022-2023

Mamit 25th January, 2023 : Pu Lalchamliana, Taxation, Home, Disaster Management & Rehabilitation Department changtu Minister chuan vawiin khan Mamit Dinthar venga Taxation Office Building thar chu khuallian niin a hawng.

Khuallian chuan mi building luah tawh lova, anmahni department building ngei hawn theih a ni ta chu lawmawm a tih thu sawiin a satu Contractor leh a viltu Department chungah lawmthu a sawi a. Taxation Department chu Mizoram Sorkar tana sum khawntu ber anih angin tunah hian GST bakah chhiah chi hrang hrang khawn mek a ni a. Vaibelchhe 730 chhiah khawn tura Sorkarin a tuk chu thla 9 chhung lekin Vaibelchhe 717 a khawn tawh a ni. Chutiang anih tak avang chuan Sorkarin target tipungin Vaibelchhe 730 atangin Vaibelchhe 900-ah tihpun a ni a. Hei vang hian Taxation Department staff te'n Sorkarin a tihpun leh tak chu tlin ngei tum tura theihtawpchhuah turin duhsakna a hlan.

Minister chuan Sorkarin amahin pawisa a nei lova, mipuite atanga chhiah hrang hrang khawn atangin Sorkarin sum a nei chauh a ni tih hrereng chungin mipuite'n kan rilru put hmang kan tihdanglam a tul a, chhiah pek kawngah rilru zau leh puitling tak kan put a ngai a ni a ti. 14th Finance Commission hnulamah Sorkar laipui chuan kan deficit grant min pek tlem tial tial avangin zawi zawia mahni-a intodelh a, mahni ke-a din a lo ngaih tak avangin chhiah lakna kawnga a department neitute chuan theihtawpa tan a ngaih lehzual tur thu a sawi a. Building thar taxation department, Mamit-in an nei chu a lawmpui rualin chona thar petu ni sela, Sorkar tana chhiah an khawnna kawngah phurna petu nise la tiin theihtawp an chhuah zelna turin duhsakna a hlan a ni.

He hunah hian Pu Vanlal Chhuanga, Principal Secretary, Taxation Department chuan thu a sawi bawk.

EE, PWD, Project Div. II chuan Technical Report pein Taxation Office Building leh Chowkider Quarters sakna atan hian Estimate Amount chu Rs. 328.53 lakhs anih thu a tarlang a. Contractor hi Pu H. Rohmingthanga, Mamit Lungsir niin Ni 31.10.2019 atanga sak tan niin Ni 30.03.2022-ah sak zawh a ni. A building zau zawng hi 596.36 Sqm. a ni a. Basement I Floor-ah Parking awmin, Basement II Floor hi Chowkidar Qrts tur niin Bedroom, Living room, Kitchen leh Dining room te a awm a. Ground Floor-ah Tax Payment Counter leh Staffs Room awmin First Floor-ah Deputy Commissioner of State Tax Room, Asst. Commissioner of State Tax Room, Photocoping Room bakah Store Room te a awm bawk a ni.

He hun hi Pu Kailiana Ralte, Commissioner of State Tax, Govt. of Mizoram-in kaihruaiin Pu T. Zohmingliana, Deputy Commissioner of State Tax, Mamit Zone-in lawmthu a sawi. He hunah hian Addl. Commissioner of State Tax, Jt. Commissioner of State Tax, Govt. of Mizoram bakah Sorkar Officials dangte, Mamit khawpui chhunga tlawmngai pawl leh khawtlang hruaitu aiawh, sawmbikte bakah thutharthehdarhtute an tel a ni.