Mizoram Judicial Service Association chuan vawiin khan Aijal Club ah General Conference vawi 25-na an hmang a, Law Minister Pu Lalsawta’n a hmanpui.

Minister chuan Dan lama mithiam rual MJSA member te hnenah thusawiin mipui rorelna democracy innghahna ban pathum - Legislature, Executive leh Judiciary ah an tel avanga, MJSA member te chu an tel lova ram rorelna a kim loh thu a tarlang a, rorelna dik a awm theih nana mawhphurtu leh tihlawhtlingtu an nih avanga an dinhmun pawimawhzia hre reng thin turin a chah. Court rorelna-in a tha zawng leh tha lo zawnga mipui a nghawng theih avangin dik taka rorelna kalpui zel turin a fuih bawk. Tunhma zawng aia court rorelna a pawimawh dan leh mipuiin an ngaihven thu te sawiin Minister chuan dan lam mithiamte chu ram, hnam leh khawtlang tilungmuangtu an nih thu a tarlang a. Thiamlohna nei lo jail-a an tang leh misual khawlaia zalen taka an lenna ram kan nih a hlauhawm tiin Pu Lalsawta chuan rorelna dik kengkawh tura dik tak leh fimkhur taka rorel thin turin a fuih a, suma lei theih loh roreltu tha ni turin a chah bawk. Zoram mipui ten anmahni chu dik taka rorel turin an ring tawk a ni tiin an mawhphurhna pawimawhzia hre renga, Sawrkar thupui ‘Rorelna dik’ tihlawhtlingtu ni turin theihtawpa tan la chunzawm zel turin Judicial Officer rual te chu a chah bawk. Sawrkar hruaitute zingah an thawhpui thin dan lam mithiam an awm thu sawiin an mamawh leh harsatna te chu Sawrkar chuan hriatpuiin theihtawpa a ngaihtuah sak mek dan te a sawi lang bawk. MJSA General Conference hi Vice President Pu Vanlalmawia, Addl. District Judge-in a kaihruai a, Pi Lucy Lalrinthari, Special Judge, ND&PS Act chuan memberte lawmna thu sawiin an mamawh leh harsatna te Minister hnenah a thlen bawk.

MJSA ah hian tunah member 31 an awm mek a, Mizoram hmun hrang hrang atangin an kalkhawm a ni.