Ram hmasawn nan leh hnam changkanna a lo awm theih nan zirna hi hmanrua a nih piah lamah ram mipui zingah lehkhathiam an pun a ngaih thu Health Minister Pu Lal Thanzara chuan vawiin khan Vanapa Hall-ah Mizoram RMSA hnathawktute Association khawmpui chhimtute hma ah a sawi a. Zirtirtute chuan zirlaite hnena thiamna pek bakah mithiam an nih angin an chhehvel mipuite ti engtu ni tur leh an hnena sawrkar hmalakna hrilhfiah thin turin mawhphurhna an nei tel a ni a ti.

Mizoram RMSA Employee Welfare Association(MIREWA) khawmpui hi a vawi 2-na a ni a, hun pahnih ah then niin hruaitu thar inthlanna hun leh pawl tana hmalakna tur relna hun bik pawh hman nghal a ni.

MIREWA khawmpui a thusawitu Health Minister Pu Lal Thanzara chuan sawrkar nek zawng nilo, sawrkar hmalakna tichak zawnga pawl indin an awm chu lawmawm a tih thu a sawi a. Sawrkar kan tih hian office hnathawk leh sawrkar a hlawh la te sawina a ni ber lova, sawrkar neitu tak zawk phei chu mipuite an ni tiin ram hmasawnna atana sawrkar hmalakna chu a neituten an thlawp that phawt chuan a sawt thin a ni a ti. Mizoram ah corporation lian te a awm ve loh avangin sawrkar hnathawk hlawh ah kan innghat nasa a. Heta tanga kan kaisanna tur chu ram mipui tam zawk 60% aia tam zawk thingtlang loneih leh eizawnna danga innghat te hi flagship programme leh kawng dang hmanga tih hmasawn a state economic tihlen a ni a ti a. Hmasawnna ruhrel siam in sawrkarin theihtawp a chhuah laiin vanduaina te a lo thleng chu pawi a tih thu a sawi a. Hengah hian inpuhmawhna tur a awm lova, vanduaina avang liau liauva thleng a ni tih mipuiten hria se a duh tih a sawi a. Heng vanduaina avanga hna khaihlak te pawh hi monitoring changtu Department hotulu ber ber ten a hmunah tlawh tawhin a rang thei ang ber an siam tur thu sawiin contract hna tha taka thawh a nih theih nan mi thahnem ngaizualte chu hnathawktu chim lo tur leh tur hmanhmawh lo turin a ngen a. Ram mipuiten ngaihhlut zawng leh ngaihnat zawng diklo te pawh a awm thei a chu chu siam that a hun a, tawng pakhat chiah hmanga ram mipui zawng zawng inbe tlang thei hi siam that a har lova, tih hmasawn pawh a har lo a ni a ti. Mi awmthei zawka ngaih ten BPL leh AAY rate a quota kan khul thin tihtawp tumna pawh hi ringtu awmna rama cheng mipui tan chuan dodal a mawi lo a ni a ti.

MIREWA General Assembly vawi 2-na programme hi an pawl President Pu R.Lalchhuanmawia’n a kaihruai a, programme hman chhung hian an pawl annual report ngaihthlakna neih a nih bakah an member fam ta te sunna hun pawh hman a ni. Tun dinhmunah RMSA ah hian thawktu: Teacher -532, Laboratory attendant – 280, clerk -81 leh thawktu dangte awm in Mizoram pumpui ah RMSA School – 81 a awm mek a, MIREWA bikah hian member – 508 an awm a ni. Teacher te hlawh hi Rs 27,000/(fixed) niin Mizoram rural Bank ah Teacher tan Rs 2,00,000/ leh Clerk/Lab attendant tan Rs.1,50,000/ chin loan an puk phal sak an ni.