Mizoram Sericulture Service Association (MSSA) Annual General Conference vawi 35-na chu vawiin khan Conference Hall, Directorate of Sericulture, Chaltlang ah neih a ni a, Sericulture Minister Dr B.D.Chakma-in a hmanpui.

Khuallian Minister chuan MSSA member zawng zawng te hnenah chibai bukna hlanin vantlang mipui te hriat thama hma la turin thawhhona tha tak nen hma la chhunzawm zel turin a fuih a. Sawrkar sum harsatna kara Chief Minister duhsakna avanga thawktute rawih chhunzawm zel an ni chu lawmawm a tih thu a tarlang. Engkim langtlanga hnathawh a tul tawh thu sawiin Minister chuan dik tak leh felfai taka hma la chho zel turin a chah bawk.

MSSA Annual General Conference hi President Pu C.Hrangzawna’n a kaihruai a, an department tihchangtlunna tur leh hmalakna hrang hrang te leh thawktute hamthatna te an rel a, India rama silk thar chhuah tipung turin kum thar 2016 ah theihtawp chhuaha hmalak an rel bawk. General Conference ah hian kum kalta chhunga an member boral 4 sunna hun an hmang a, kum 2016-2017 chhunga hruaitu atan heng mite hi an thlang bawk :- Pi Lalmuansangi, Pu C.Hrangzawna, Pu K.C.Lalpianthanga, Pu C.Lalnunzira, Pu Vanlallawma, Pu R.Lalbiakthanga, Pu Lalrinawma.