Thalfavang Kut 2015 Organising Committee chu an Chairman, Tourism Minister Pu John Rotluangliana hovin a pisaah an thukhawm. Kut hlawhtling taka buatsaih a nih theih nan Organising Committee hi vawi engemawzat an thukhawm tawh a, kar leh December ni 10 atanga hman tan tur Thalfavang Kut 2015 hi hlawhtling taka hman a nih theih nan inbuatsaihna ngawrh taka kalpui mek a ni. Meeting-ah hian Department hrang hrang aiawhte bakah Kut a mawhphurhna nei Association hrang hrang hruaitute an tel a. An inbuatsaihna report ngaihthlak niin harsatna an neihte committee hmaah an thlen nghal bawk.

Ruahman dan chuan Thalfavang Kut 2015 hi Tuirial Airfield ah December ni 10, Ninganiah Tourism Minister Pu John Rotluangliana’n a hawng ang a. Hawnna programme hi chhun dar 12 ah tanin zaithiam zai ngaihthlak tur te, hnam lam leh concert pui tham tak en turte a awm nghal dawn a ni. Kut hman chhung zawng hian intihhlimna chi hrang hrang buatsaih tum a ni a. Thal inkahsiak te, rifle inkahsiakte, 2 wheeler leh 4 wheeler racing te, hot air baloon, powered hang gliding, paragliding joy ride, aeromodel exhibition, handloom and handicraft exhibition te bakah ei tur tui tak tak ei na tur food plaza siam tum a ni a. Mizoram Motor Sports Association (MIMSA) bultumin State pawn atanga chah chhuah stuntman te’n motorbike stunt an entir ang a. Aeropsports Association te hmalakna in pilot sawm rual zet chah chhuah an ni bawk ang.

Organising Committee te hian bialtu MLA, Mizoram Legislative Assembly Deputy Speaker Pu R Lalrinawma hovin vawiin chawhnu khan Tuirial Airfield an tlawh a. Thalfavang Kut atana inbuatsaihna a hmunah an endik a ni.