2204/2023-2024

Aizawl, 7^th October, 2023 : DIPR Minister Pu Lalruatkima, Aizawl West-II A/C bialtu MLA ni bawk chuan tukin khan Tuikual North-ah Tuikual Futsal Ground a hawng a, Aizawl Deputy Mayor, Ward-XII Corporator ni bawk Pu R. Thanglura pawhin he hun hi a hmanpui a ni.

He Futsal Ground hi MLA Fund bakah sum awm thei remchang chi hrang hrang dap a sak a ni a, a hmun laih zawl atanga sak zawh a nih thleng hian cheng nuai 48 sen a ni. A chhuat hi 40 metre x 20 metre a zau cement slab chhun niina chungah artificial turf phah a ni a. Futsal ground panna kawng lirthei kal theihna turin siam mek niin,  zan lam thleng pawha inkhelh theih turin Local Council in solar light an dah bawk a, Futsal ground hi thirlen sang chi a hung chhuah vek a ni bawk. November, 2019 khan he Futsal ground hi sak hna hi thawh tan a ni a, tun dinhmunah Mizorama Futsal ground lian ber dawttu a ni.

Minister Pu Lalruatkima chuan Futsal ground hawnna inkhawm buatsaihah thu sawiin, nghakhlel taka kan lo thlir thin a hlawhtlinna kan hmu ta hi a lawmawm takzet a ni a ti a. Kum 5 chhunga bial chhung hmasawnna hna thawh hrang hrangte tarlangin Local council leh tlawmngai pawl hrang hrangte bakah khawtlang mipui ten an tawiawm thinna ah lawmthu a sawi bawk a ni.

Thalaite hmasawnna ngaih pawimawh a nih thu sawiin Pu Ruatkima chuan Tuikual North YMA Hall-ah badminton carpet phah thar a ni a, Tuikual South huam chhung Tuikual lui kama Rokunga Volleyball Court leh Ralliana Memorial Basketball court te chu chei tha a mini-sports complex changtlung tak din tum a nih thu a sawi a, hemi atan hian SASCI kaltlangin cheng nuai 120 sanction hmuh a nih tawh bakah hn thawh tan theih mai turin work order pawh a awm tawh tih a sawi bawk a. Tuikual North-a indoor stadium building chu a hlui deuh tawh avangin PMJVK hnuaiah cheng vaibelchhe 16 senga chei that tur a nih thu leh basketball leh volleyball court bakah thil dang tangkai tak tak dah a tihchangtlun a nih tur thu a sawi bawk a ni.

Pu Ruatkima chuan Dinthar vengah basketball court changtlung tak SASCI kaltlangin siam mek a nih thu a sawi a, Aizawl Smart City hnuaiah cheng vaibelchhe 13 man Smart Parking (lirthei dahna) Ebenezer Medical Centre bulah sa turin hma lak a nih thu leh a lungphum pawh phum a nih tawh thu a sawi a, hna thawh tan mek a ni a ti a, khualzin veivakte thlenna tur room 3, vantlang inthiarna changtlung tak siam a nih dawn bakah futsal ground siam tel a nih tur thu a sawi bawk a ni. Dawrpui Vengtharah infiamna hmunhma tha zawk nei turin SASCI sum nuai 118 sengin hma lak a nih thu sawiin Kanan vengah basketball siam turin ruahmanna siam a nih thu a sawi bawk a ni.

Aizawl Deputy Mayor Pu R. Thanglura pawhin Tuikual Futsal ground hman theih tura hawn a ni ta chu lawmawm a tih thu sawiin, futsal ground sak puitlin a nih theihna tura tha leh zung seng tu zawng zawngte chungah lawmthu a sawi bawk a. He hmasawnna thar hian hmasawnna thlen tur leh veng hrang hrangte inlungrualna thlentu ni se a duh thu a sawi bawk a ni. Veng neitute pawh rilru nzau tak pu a veng dang atanga inkhel tura rawn kalte dawngsawng thin turin a chah bawk a ni.

Futsal ground hawnnaah hian Aizawl West-II A/C huam chhunga local council leh tlawmngai pawl hrang hrang hruaitute an tel a ni.