2203/2023-2024

Aizawl, the 6th October 2023 : Vawiin khan Rural Development Minister Pu Lalruatkima’n a Office Chamber MINECO atangin Online Mode in Tipa RD Block, BDO Office sak thar leh District Rural Development Office (DRDO) Project Director Siaha leh Khawzawl te chenna tur Quarters sak thar te a hawng.

Pu Lalruatkima chuan Pathian hruaina leh malsamwna changa kum 5 chhungin Rural Development Department chu theihtawpa a enkawl thusawiin Department hmalakna te enin, kan hlawhtlinna leh mipui rawngbawl kawnga kan hnathawhte hi a lungawithlak in ka hria, a ti a. Hengte hi thawktute thahnemngaihna leh inpekna avangte leh mipui atanga thlawpna leh tawiawmna kan dawn that vang chauh a ni a, heng zawng zawngah hian lawmthu ka sawi a ni, a ti bawk. State hrang hrang RD Department te hnathawh tehna pakhat a RD Department Mizoram chuan dinhmun 2 na a luah thu tarlangin, Ministry lamin thlirletna meeting an koha state dangte an hauh lain Mizoram chuan fak a hlawh a, MGNREGS kan hlawhtlinna te a hmuna zir turin Puducherry RD Minister hialin kan hma lakna a rawn en a ni, a ti.

Department hnuaia scheme hrang hrang hnathawh leh hlawhtlinna te tarlangin kum 5 chhungin kumtin ni 100 in hlawhna MGNREGS chu ni za ang zel in kan ti thei a, hei hi a hlawhtlinna ropui tak a ni a, kumin Sawrkar kum kal lai mekah pawh hi hi tih hlawhtlin tumin hma kan la mek a ni, a ti. Rurban Mission hnuaia hmalakna SPRM ah India rama cluster 300 zinga Aibawk Cluster chu hna zo fel hmasa ber a nih thu te, MzSRLM hnuaia thalai training chhuak te chu rampawn thlengin an thawk mek thu te, SHG kaltlangin thingtlang miten eizawnna kawng an hlawhtlinpui dante leh PMSKY ah project 18 phalsak an nih thu te pawh a sawilang bawk a ni.

Vawiina office leh quarters hawn te chu Department hmasawnna piah bakah mipui tan malsawmna a nih ngei a rin thu sawiin RD Department a thawktu zawng zawng chu vawiin aa thlen chu duh tawk mai lovin inpekna leh ngaihtuahna thar nen an hna thahnemngai taka thawk zel turin a fuih a ni.

Programme hi Pu Zarzosanga, IAS, Commissioner & Secretary, RD Department in kaihruaiin kum hna chhungin Department chu nasa tak a than thu a sawi. Pi R. Lalmuanpuii BDO, Tipa RD Block; Pi Marilyn Rualzakhumthangi, PD DRDO Siaha leh Pi V. Lalmuanpuii, PD DRDO Khawzawl te theuhin an building thar chanchin tlangpui an tarlang a. Pu V. Lalengmawia, Joint Secretary, RD Department in lawmthu sawiin hun a khar a ni.

BDO Office, Tipa RD Bloch hi concrete building chawng 3 a sak niin a sak nan cheng nuai 182.94 lakhs sen a ni a. PD Quarter Siaha pawh hi concrete building chawng 3 a sak niin a sak nan cheng nuai 142.30 lakhs sen a ni. PD Quarter Khawzawl pawh concrete building chawng 4 a sak niin a sak nan cheng nuai 157 sen a ni.