Lengpui Branch YMA chuan ni 23-24 October, 2015 chhung khan an din cham vawi 78-na lawmna programme an hmang a, ni 24 October 2015 (Inrinni) tlai khan City Inter Branch YMA football Tournament, 2015 a Runnerup an chan lawmna leh Raising Day lawmna ruai leh kharna inkhawm te chu bialtu Pu John Rotluangliana Transport Minister-in a hmanpui.

Minister chuan Lengpui Branch YMA-in kum 78 champha an thleng thei chu a lawmpui thu sawiin YMA chu Mizo te lungrual taka kan awmna pawl awm chhun a ni, a ti a. Hnamdangin an neih ve loh pawl ropui, Mizo hnam nun vawngtu leh thalaite kaihruaitu kan nei hi kan vannei tak zet a ni, a ti. Bairabi-a YMA General Conference a Central YMA hruaitu thlan tharte a lawmpui thu a sawi lang bawk. Lengpui Branch YMA-in chawimawina a hlan zirlai titha te chu an taimakna leh hlawhtlinna ah a fak a, midangte pawh anmahni anga zirna uar tur leh chawimawina dawn ve ngei tum turin a ti a. Lengpui khua chu khaw kawtchhuah pawimawh a ni tiin India ram chhung leh pawnah lehkha zir leh hnathawka Lengpui nula leh tlangval an thlen ve a hun tawh a ni, a ti. Zirlaite chu thiam taka zir tur leh Mizoram mai nilo, India ram hmun hrang hrang leh India ram pawn lama eizawng theia thiam taka lehkha zir turin a fuih a. Engmah hnathawh nei lova teihawi mai mai lova, taima tak leh thahnemngai taka hna thawk turin leh ram leh hnam tana mi tangkai nih tum theuh turin YMA member kalkhawmte chu a chah bawk a ni. Tourism Department hmalakna Anthurium Festival hlawhtling taka hmang thei tura Lengpui thalaite leh khawtlang inpekna leh an tawiawmna ah lawmthu a sawi bawk.