Nimin (23.10.2015) chawhnu khan Mizoram Chief Secretary Pu Lalmalsawma, IAS chuan Champhaia Sorkar Office hrang hranga hotute kawmna I&PR Auditorium, CHANEM Building-ah a neihpui.
He hun hi Pu H.Lalengmawia, Champhai DC chuan a kaihhruai a. Thusawiin Chief Secretary-in Champhai leh a chhehvel a rawn tlawh chu lawmawm a tih thu leh, inkawmhona buatsaih chu Sorkar hnathawkten an hlawkpui ngei a beisei tih a tarlang a.
Chief Secretary Pu Lalmalsawma chuan thu sawiin, sorkar hnathawh hi mimala thawh chi a ni lova, Sorkar hnuaia hnathawk zawng zawngte tanrualna tur zawk a ni, a ti a, kawng tam takah thawhho ngaihna a awm a, harsatna tam tak chu mimala sutkian chi a ni lova. Hei vang hian Sorkar hnathawkte chu tanrual a, thlahthlam leh thlauhthlak bik an awm a thiang lo a ni, tih a tarlang ve bawk.
He hunah hian Sorkar Department hrang hrangten an hmalak dan tlangpui tarlanna an neih bakah an hlawhtlinna leh an harsatna tawhte chu Chief Secretary hriatah hian an tarlang a. Kelkanga tui harsatna chungchang te, District Hospital-a doctor indaih lohnate, Inbiak pawhna kawnga Champhai District in harsatna a tawh dante tarlan bakah kawlphetha lakluh kawnga an harsatna te leh thil dang dang tarlan a ni a. Department hrang hrangten harsatna an tawh mek chu Chief Secretary hian a theih chinah chinfel ngei anihna tura hmalak zui anih tur thu a sawi a ni.
Chief Secretary hian Ningani (22.10.15) khan Zokhawthar Land Customs Station chu tlawhin, thawktute nen an he hmun hi hawn anih atanga an hmasawn zel dan leh harsatna an tawhte zawtin chipchiar taka inkawmna hun a lo neihpui tawh bawk.
