Vawiin hian Lawngtlai District Swachh Bharat Missions (Gramin) buatsaihin thingtlang khaw pali, Ngengpuikai, Mampui, Upper Saikah leh Paithar ah te Faina Inzirtirna hun (Rally) buatsaih a ni a. Khawchhung tifaia hnatlang neih nghal a ni.
Lawngtlai District Swachh Bharat Missions hmalakna kal zelah District Swachh Bharat (Gramin) Committee member te chu hmun hniha inthenin vawiin hian heng khaw palite hi an tlawh a. Swachh Bharat hnuaia hmalakna awm te leh faina kawnga mipuiten awlsam taka tih theih kan neih te inhrilhhriatna hun a tana hman a ni a, awlsam taka faina lama hma kan sawn mai theihna ang chi thil pawimawhte inzirtir nghal a ni.
Ngengpuikai leh Mampui ah te hian District Swachh Bharat (Gramin) Committee Chairman Pu R. Lalsangluaia, Addl. DC hovin member te Pu K. Saitluanga, IPRO Lawngtlai leh Nodal Department PHE SDO, Pu Lallawmpuia te an kal a. Upper Saikah leh Paithar ah te hian District Member Secretary Pu Ngentluanga, Sr. EE PHE leh member te Dr. HC Thangkima, CMO Lawngtlai leh Pu Vanlaltanpuia, DEO Office aiawhte an kal thung a ni.
Swachh Bharat Missions (Gramin) hmalakna kal zelah Lawngtlai District pawhin theihtawp a chhuah zel a. Nimin piah lawk (22.10.15) pawh khan Rally hi Kawlchaw West ah neih lo ni tawh in, chumi zan chuan Lawngtlaiah zirlai naupangte tan inhnial fiamna (Debate) Live Telecast in Lawngtlaiah buatsaih a ni a. Hmalakna tur engemawzat chhawpchhuah a awm mek bawk a ni.
