Vawiin khan Local Administration Department (LAD) leh Fisheries changtu Minister Pu K.Lalrinliana chuan LAD leh Fisheries Directorate a tlawh

Minister chuan LAD Directorate leh Aizawl DLAO office tlawhin a hmun hma te fan pahin staff te nen in hmelhriat na hun an hmang a. Director room ah officer te nen in kawm na hun an neihah Department thil pawimawh leh hmalakna tur te an sawiho. Minister chuan tun hma Village Council President a nih thin laia LAD Department inthlak danglamna a hmuh te sawiin, SEDP hnuaia village registration an tih na turah Nodal Department an nihna anga department hnuaia thawktu ten tun aia thahnemngai leh zuala an thawh a ngaih dawn thu te a sawi a. Hei hian dan lo ang a khaw din thin chu a tih tlem bakah a awm belh zel tur ven nan a tangkai tur thu te a sawi bawk a ni.

Minister chuan Fisheries Directorate tlawhna hun hmang leh in officer leh staff te nen meeting an nei a. Pu K.Lalrinliana chuan kum 1986 atanga sangha enkawl dan a hmelhriat chhoh thu leh an sangha zawrh thin hunlai leh tun dinhmunah market demand a inthlauh nasat tawh zia a sawi a. Mizo ten sangha ei kan in tih hmuh nasat zia leh doctor te pawhin damlote tana sa hrisel tih an hriat avanga damlo te ei tura thurawn an pek fo avangin mipui mamawhna a lo sang chho zel a, sanghaah Mizoram a intodelh theih nan Fisheries mitiamten fish farmer te fuih leh kaihruai zel tul a tih thu a sawi a ni. Minister hian sangha leh kaikuang leh ulawng thleng a zirchianna (experiment) a lo tih thin tawh thu sawiin lui a sangha tui tak tak te chu dil a khawi theih a ni em tih te, a tui leh note siam chhuah dan kawng a awm em tih te zirbingna neih theih a pawimawh tiin SEDP hnuaiah fish farmer te nen thawhho na tha zawk an neih theih nan society din nasa tura farmer-te fuih turin thawktute a chah a ni.

Fisheries Director chuan Minister chu tun hma atanga fish farmer niin a dil enkawl te pawh vawi tam tak a lo tlawh tawh thu a sawi a. Fish farmer ni thin Fisheries enkawl tu tur Minister a dah a lo ni ta chu lawmawm a tih thu leh amahah beseina sang tak an neih thu a sawi a ni.

In kawm ho na hun ah hian department mamawh leh harsatna an tawh te bakah hmalakna tur tul dangte an sawiho nghal bawk a ni.