Vawiin khan Secretariat Conference Hall ah State Level Screening Committee on Border Area Development Programme (BADP) chu an Chairman Pu Lalnunmawia Chuaungo hovin an thukhawm a, kum 2019-2020 chhunga BADP hnuaia hnathawhna tura sum ruahman Rs nuaih 5367 chu Sawrkar Laipui pawmpui tura thlen remtih a ni.

Mizoram chhunga RD Block 26 zinga RD Block 15- Ngopa, Champhai, Khawbung, East Lungdar, Hnahthial, Bunghmun, Lungsen, Siaha, Tipa, Sangau, Lawngtlai, Bungtlang South, Chawngte, West Phaileng leh Zawlnuam te hi BADP huam chinah an awm a, Heng RD Block zawng zawng hnuaia kum 2019-2010 chhunga hnathawhna tur a ruahman chu Rs. Nuaih 5183 (Central Share Rs. 4646 lakhs, State Matching Share Rs. 537 lakhs) a ni a, hei bakah hian Modified Guidelines of BADP, June 2015 in a phal angin BADP hnuaia hnathawh vil zui a endikna atan Rs nuaih 50 dah niin, hian Modified Guidelines of BADP, June 2015 in aphal ang bawkin tul bik leh project hmanhmawh thlak lo awm thut thei dawm nan SLSC Chairman in a tul anga a hman turin Rs nuaih 134 dah ani bawk.

BADP guidelines ah chuan BADP hnuaia project siam reng reng India border atanga kilometre 10 huam chinah thawh tur ani tih a ni a, Ministry of Home Affairs in ruahmanna thar siamin tlemin a thlahdul hret a, India border atanga khaw hnai ber atanga chhiar a kilometre 10 huamchhungah BADP hnuaia project te kalpui theih ani tawh a ni.

BADP hnuaiah hian India ramri venghimtu sipai (Border Guarding Forces) te tan RD Block tinah BADP sum hman tur a ruahman zat atanga 10% theuh dah hran tur a tih ani a, BADP huam chin chhunga guidelines in a phal ang chi project hrang hrang Border Guarding Force ten ruahmanna an siam te chu hemi 10% chhungah hian khung tel thin tur a ni.

Vawiin thutkhawmah hian BADP hnuaia Capacity building emaw, Skill Development training buatsaih anih dawn reng rengin bialtu MLA te hrilhhriata anni hriatpuina a huaihawt tur anih thu sawilan a ni a, State Level Screening Committee in project a approve tawh reng reng lo kaihher emaw, pawhpen emaw anih loh nan a tul anga tan khawh tur anih thu BDO kalkhawmte hnenah hrilh an ni bawk.