India rama Industry pawl lian tak Confederation of India Industry (CII)-in an buatsaih, in / kawngpui / lei sakna hmanrua lian construction equipments phochhuahna, hmarchhak puala ni 27 Feb - 1 March 2015 chhunga Guwahati-a neih tur ConMac 2015 sawihawnna chu nimin tlai dar 6:30 khan Hotel Floria, Dawrpui ah Health & Family Welfare Minister Pu Lal Thanzara’n a hawng.
Minister chuan thusawiin Mizorama kan la hmelhriat loh Confederation of India Industry ten Company lian tak tak sawm khawma khawl leh hmanraw thar leh lian tak tak pholanna, hmarchhak puala Guwahati-a an buatsaih tur chu lawmawm a tih thu a sawi a, Mizo contractor leh engineer te pawhin chhim ve ngei se an hlawkpui a beisei thu a tarlang. Hmarchhak chu inkalpawhna kawng that loh vanga harsatna hrang hrang tawk thin an nih dan te, inkalpawhna siam changtlung tura kawngpui lian tak tak siam mek a nih thu te a tarlang a. Mizoram ah ngei pawh World Bank suma kawngpui lian siam mekna ah te khawl tha leh changkang mamawh a nih dan tur te a sawifiah bawk. Mizo contractor te pawh hmasawn zel tura khawl thar leh tha zawk hman tuma inbuatsaih turin a chah bawk.
ConMac2015 Roadshow hi Mizoram Chamber of Industries (MCI) President Pu K.Lalhmingthanga’n a kaihruai a, Pu Glenville da Silva, Chairman, ConMac 2015 & Vice President, Business Development Asia Volvo Construction Equipment leh Pu Anand Sundaresan, Leader - ConMac 2015 Task force on Road Shows and Vice Chairman & Managing Director, Schwing Stetter (India) Pvt. Ltd. Chennai ten ConMac 2015 neih tur chungchang te an sawifiah bawk.
