Chief Minister Pu Lal Thanhawla chuan vawiin khan Chief Secretary Conference room ah Mizoram sorkar hnuaia Secretary te meeting a neihpui.

Chief Minister chuan an sorkar hmasak khan hetiang meeting hi a neihpui tawh thu leh DC leh SP zawng zawngte pawh alo neihpui tawh thu sawiin, ngaihtuahna tha nia a hriatte sorkar hnathawk hotute (bureaucrats) han sawipui a duh vang thin a ni a ti a. Chief Secretary thar, viak tha tak mai hian hetiang hun buatsaih tha a tih chungchangah leh sorkarin kum khat hmel a hmuhnaa hetiang meeting buatsaih a ni chu a inhmeh hle a ni a ti.

Chief Minister chuan policy te, kaldan tur ruangam leh kalphung te kan duan hian kan ngaihtuahna te hlawk zawk tura kan inher rem ve a tul thin a ni a ti a. Central sorkar laipui dawr tura kal chang hian Ministry hrang hrangin Mizoram chu hnathawk chaklo min ti thin a, a zahthlak duh hle a ni a ti a. Hei vang hian July 2014 khan department tinte chu an hnathawh te, plan fund an hman dan te, utilization certificates leh performance reports thehluh thu ah a sawipui tawh a ni a ti a. Chief Minister chuan Secretary te chungah sorkarin beiseina sang tak a nei a ni a ti.

Chief Minister chuan sum inrenchemna nipahfawmin, Delhi kal a tulnaah mahni kal kher lovin Delhi a Mizoram House a thil chinchang hre tak sorkarin a dah thar OSD khu thil tih ngai zawng zawng hriattir hmasak a hmang tangkai thin turin Secretary rual te chu a fuih a. Hei hian helama thawh tur tulte tluang tak leh felfai takin an thawk hman thei dawn a ni a ti.Pu Hawla chuan kumin 2015 a kan thawh tur zinga pawimawh hmasa chu project leh scheme hrang hrang thawh mekte vil ngun leh endik hna a ni a ti a. Flagship programme NLUP hi thingtlng mi harsate leh khawpuia mirethei te chawikanna tur a ni tih hre reng chungin, kan kalpui danah NITI Aayog in thil hriat duh an rawn dilte chu kimchang taka hrilhhriat thuai turin a chah a. Hriselna lam leh zirna lama scheme kan neihte endik leh avil thuah Chief Secretary kal chhuak ta kha thurawn a pek thu sawiin, Chief Minister chuan endik theih target Infant & Maternal mortality Rate leh school leh college zir zawm lo (drop-out) rate siam tura a tih thu a sawi a. Heng hi a ngaih pawimawhna chhan chu Millenium Development Goals pakhat a nih vang a ni a ti.

Thil dang Secretary tena an hriat tura a tarlan zingah Pu Hawla chuan Central sorkar hnuaia senior officer ten VIP te thurawn ngaihpawimawh hmasakah an neih thin chu Mizoramah pawh ching ve ila a ti a. VIP te thurawn bawhzui thuai a nih theih nan an puala a bawhzuina leh endikna file bik te siam tha a tih thu a sawi a. A bikin Assembly sessionah thudik tawklo pek chang awm thinte hi zahthlak a tih thu sawiin, sessiona hetiang sawichhuah tur an pekte vil uluk thin turin a chah bawk a ni.

Chief Minister chuan Audit chhanna te ngaipawimawh tura chah bawkin, central sorkar program thenkhat direct fund hmu thin NRHM, National Horticulture Mission, National Bamboo Mission leh a dangte hi a vil hna in duhthu a sam lo tiin, kumin sorkar kum thar atang chuan heng fund lokalte hi Finance Department kaltlanga tih tawh tur a ni a ti.

Meeting hi Chief Secretary Pu Lalmalsawma, IAS in a kaihruaiin, meeting-ah hian agenda siam anih loh thu leh Chief Minister in sorkar hnathawk hotulu te kum thar chibai buk paha sorkar leh mipui tana thil tha tura ngaihdan kan neihte sawiho a duh vanga in kokhawm an nih thu a sawi a ni. Secretary te an kal tha hle a ni.