Sawrkar Laipuiin mimal ram a lak dan, zangnadawmna a pek dan leh a ram neitute a chawmdawlna atana Dan thar a siam ‘The Right to Fair Compensation and Transparency in Land Acquisition, Rehabilitation and Resettlement Act 2013’ chu Mizoram dinhmun ngaihtuahin hman remchang lo deuh a hriat a nih avangin hemi chungchang zirtur, ngaituah leh a tul chuan dan thar duang tur atana Mizoram Sawrkarin Drafting Committee a din chu vawiin khan Land Revenue & Settlement Minister leh he Committee Chairman ni bawk Pu R. Romawia hovin a vawikhatna atan Land Revenue & Settlement Directorate Conference Hall-ah an thukhawm.

Pu R. Romawia chuan Drafting Committee din a tulna chhan te sawiin he Dan thar hian hemi chungchanga Dan kan hman mek ‘The Land Acquistion Act, 1894’ chu a nuai bo niin ka hria a, chutih rualin Ram Danpui hnuaia Article 371(G) chuan a bik taka ram chungchanga thuneihna chu Mizoram state a pe a, chuvangin uluk takin hemi chungchang hi kan zirchian leh Mizoram dinhmun ngaihtuaha a tha ber kan duan a pawimawh a ni tiin thuhma a sawi.

Committee chuan zau taka an sawiho leh ngaihtuah hnuin ‘Land Acquisition and Requistion’ chungchangah hian Central leh State sawrkarte thuneihna intawm anih avangin hemi chungchanga Ram Danpui hnuaia Article 371 (G) a Mizoram dinhmun leh Ram Danpui hnuaia Article 371 (A) a Nagaland dinhmun te uluk zawk a zir chian nise tih te, Nagaland sawrkar in a kalpui dante zirchian nise tih te leh New Delhi a Resident Commissioner kaltlanga hemi chungchangah Constitutional Expert rawn dan kawng dap nise tih te an rel a, chumi hnuah chauh Mizoram sawrkar ina hma a lak zel dan tur la ngaihtuah nise an ti.