941/2025-2026

Aizawl, Ni 26, Nikir thla 2025: Vawiin khan Minister Lalnghinglova Hmar chuan Vaivakawn, Zohnuai-a lei tlak hniamna hmun a tlawh a, vengchhung mite nen inkawmin  sawrkar hmalaknate a hrilh a ni. Helai hmuna lei che thin hian vantlang kawng a tih chhiat bakah Vaivakawn Thlanmual atanga  Sairang Road (NH-6) thlengin a awh thla a ni.

Pu Lalnghinglova chuan thu sawiin, Vaivakawn, Zohnuai lei tla hniam thin siam tha tak tak tur chuan a bulthut, lui dung atanga lei tawlh tur danna Check Dam siam a ngaih thu a sawi a, thil hautak tham tak a nih avangin tun dinhmuna thil tih theih awm chu chhiatna zualpui thleng thei laka invenna tura hmalak a ni a ti.

DM&R, PWD leh Geology & Mining Department-te  hmalakna hrang hrangte sawiin Zohnuai lei tlahniam thawm thatna tur atan hian SASCI atangin Rs 3.84 Crore hmuh a nih tawh thu a sawi a, tui kawng mumal zawk, side-drain leh linked-drain te, Gabion leh Retaining Wall te siama a rang thei ang bera hmalak nghal a nih tur thu a sawi a ni.

Malsawmdawngliana, Geologist, Geology & Mining Department chuan, Vaivakawn, Zohnuai lei chet dan chu DGPS khawl hmanga an thlithlai reng thu sawiin, lei (soil) sakhat dan chungchang zirna pawh neiin lei verh (bore hole) pawh hmun 6-ah an neih thu te, hmun thenkhatah chuan lei hnuai feet 50 bawr velah lei sakhat an hmuh chauh thute a sawi bawk.

Minister hi Lalrinngheta, S.E, PWD bakah sawrkar mi pawimawh dangten an tawiawm a ni.

Vaivakawn Zohnuai lei che thin chungchanga sawrkar hmalakna tlangpuite:

•    July 5, 2024-ah PWD hotute nen Minister Pu Lalnghinglova Hmar office chamber-ah hmalak dan tur sawi ho a ni. Hemi ni vek hian chhiatna nasa zawk a thlen lohna tura hma la turin DC Aizawl, DM&R Director, P&E leh PHE bialtu SE te hnenah ziakin ngenna siam a ni.

•    July 15, 2024-ah Minister Prof. Lalnilawma leh MLA W. Chhuanawma bakah sawrkar official leh khawtlang hruaitute an tlawh a, chhiatna nasa zawk a thlen loh nan chak zawka hma lak dan tur sawi ho a ni. 

•    September 1, 2024-ah Pu Sangthanmawia in chimin, chhungkaw enge maw zat riah chhuah ngaiin an awm a. Bialtu MLA Pu Lalnghinglova Hmar chuan hemi ni hian tlawh nghalin, Aizawl DDMA leh Sawrkar Engineer te nen kawng min belh lohna tur atana hmalak dan turte rel ho a ni. 

•    March 18, 2025-ah Aizawl DC, AMC Commissioner leh PWD hotute nen MLA Secretariat-ah Vaivakawn lei che chungchang hi ngaihtuahin meeting neih leh a ni a. Hmalak zel dan tur rel a ni. 

•    June 2, 2025-ah lei che avangin chhungkaw 13 lai an inthiarchhuak leh a. Hemi ni hian bialtu MLA Lalnghinglova Hmar chuan tlawhin, Minister Pu Lalsawivunga te, DM&R Minister Prof. Lalnilawma te, sawrkar official leh khawtlang hruaitute nen a hmunah ruahmanna an siam ho a ni. 

•    June 25, 2025-ah Vaivakawn Zohnuai bialtu PWD hotute nen Minister office chamber-ah meeting neih leh a ni a. Vawiin June ni 26, 2025 khan hmalak ngaite bawhzuiin a hmun tlawh a ni a. He hunah hian PWD bakah Aizawl DDMA atangin bialtu Zonal Officer, Geology & Mining Department aiawh leh khawtlang hruaitute an tel a ni.