No.7707/2020-2021  

Aizawl Kanan veng VC hruaitu hmasa ber Pu Khuangringvunga hriatreng na leh, a hming chawia sak Khuanga Bazar chu tukin zing khan Aizawl West bialtu MLA Pu Lalruatkima Rural Development Minister -in a hawng.

He Bazar hi Commerce & Industries Department hnuaia hmalakna niin cheng nuai 8 senga buatsaih a ni a. A chhungah hian a bul țan nan mi 10 țhutna tur dawhkan siam niin a phel lehlam chu Anganwadi centre atan hman a ni a. A hnuaiah hian Kanan veng Retail Fair Price shop  awmna tur hmun hlun bakah, sangha leh arsa zawrhna tur a awm bawk a ni.

Pu Lalruatkima chuan Chapchar Kut lawmna ni takah Kanan vengin hmasawnna thar duhawm tak a nei chu lawmawm a tih thu sawiin mipui te chu Chapchar Kut chibai a buk a. He market sak a nih theihna tura bul tumtu  Commerce & Industries Department Minister Dr.R.Lalthangliana leh a hmun neitu School Education Department te, Kanan veng khawtlang hruaitu te leh mipuite chungah lawmthu a sawi a. 

Minister chuan kum 2018 a ministry thar a lo pian atangin MLA tin ten mahni bial chhung hmasawnna tur ngaihtuaha ke an pen laiin Aizawl West II bial chhungah hmasawnna tam tak hmuh tur a awm tawh a ni, a ti a. A bik takin West II bial chhung veng hrang hrang te inkalpawhna kawngpui ah hmasawnna tam tak a awm tih sawiin, Zohnuai atanga Mizoram University panna kawng Ropaiabawk thleng concrete a siam te, Vaivakawn atanga Bungkawn panna kawng concrete a siam leh black topping te, Kanan leh Chawnpui inkar kawng siam mek te, Kanan atanga Dinthar kalna kawngpui concrete a siam te,  Seventh Day tlang veng chhung inkalpawhna kawng siam te, Dawrpui Vengthar atanga Zarkawt panna kawng zauh te, heng bakah hian Jt YMA field Vaivakawn atanga Ebenzer hospital thleng panna tur leh Vaivakawn thlanmual atanga Sairang kawngpui NH pawhna tur leh Smart City hnuaia Vaivakawn bazar sak țhatna tura ruahmanna awm te a sawi a. Kanan vengah multipurpose hall sak nan Ministry of Tribal Affairs ah cheng vaibelchhe 12 man project lian tham siam a ni tih a sawi bawk. Kawng danga hmasawnna te pawh tarlangin Pu Ruatkima chuan Tuikual futsal ground leh Dinthara Futsal ground siam te pawh tangkai taka hman mek a nih thu a sawi a. Heng hmasawnna lawmawm tak tak te hi a neitu mipui ten neitu thinlung pua hmang tangkai tur leh duat taka enkawl turin a chah a ni.

Pu Lalruatkima chuan kum 2020 chhungin covid 19 avang leh ramria buaina avang te in Mizoramin harsatna nasa tak a tawk a. Harsatna karah Zonun zemawi ral tawh emaw kan tihte mawi takin a par chhuak a. Myanmar leh Manipur lama Mizo unau ten ei kan nghei hlauvin min thlamuan a, kan tan an inhuam zia a takin an lantir a. Vawiinah Mizo unau ten Myanmara sipai rorelna hnuaiah harsatna nasa tak an tawk a. Ram danga kan Mizo puite hi an harsatna leh manganna ah Mizoram sorkar chuan a ensan dawn lo va. Himna zawnga helama raltlan leh chhungte rawn bel an lo awm pawhin hmangaihna leh lainatna nen Mizo mipui te chu an lakah rilru zau tak pu turin Chapchar Kut ni ah hian a ngen a ni.

Khuanga Bazar hawnna inkhawm hi Kanan veng Local Council Chairman Pu DK Valan a kaihruai a. AMC Deputy Mayor Pu R. Thanglura leh AMC Ward XIII Councillor Pu Lalfakzuala Chenkual te bakah Commerce & Industries Department leh Kanan veng Local Council aiawh te leh Market hming putu Pu Khuanga chhungte aiawhin a fapa in thusawina hun an hmang a ni.