No.7706/2020-2021  

Vawiin chawhma dar 10:30Am khan DRDA Conference Hall, Siaha-ah Covid-19 inkaihruaihna dan zawm chungin 'Zonun zemawi-Thuawina' tih thupui-a hmangin Chapchar Kut-2021 chu hlim leh lawm taka hman a ni.

Kumin Chapchar Kut chu Covid-19 hripui leng vangin  kum dang a kan hman thin dan ang a hman a rem lo va, Covid-19 inkaihhruaina dan  zawm chungin mipui tam lovin, Official pawimawh chin te leh sawm bik te nen chauhva  Kut hi lawm a ni. 

Siaha a Chapchar Kut-2021 lawmna-ah hian Kut Pa a tan Pu H. Sahlo, Chairman, MADC hman a ni a, Kut Thlengtu a tan Pu Kesavan R, IAS, Siaha District Bawrhsap chu hman a ni bawk. 

Vawiin Chapchar Kut lawmnaa Kut Pa Pu H. Sahlô, Chairman, MADC chuan thu sawiin,kumin Chapchar Kut kan hman hian Mizoram mipui ten kan mausam tan tawh kan Zonun zemawi chawinun lehna kawngah leh thuawina kawngah rahbi thar mitin tan min tuk sak theuh rawh se, tiin kut chhimtute fuihin, duhsakna a hlan hlawm a ni.

Kut Thlengtu Pu Kesavan R,IAS district bawrhsap pawhin thu sawiin, lehkha ka zirlaia lehkhabu-ah chauh la lo chhiar thin Chapchar Kut ropui tak chu vawiina  thlengtu ka lo ni ve ta reng mai a,  ka lawm tak zet a ni.  Chapchar Kut kan lawm thin hian  zonun zemawi leh kan hnam incheina te, kan hnamlam mawi tak tak leh kan hla te a chawinun zel ka beisei a. Mizoram chhunga hnam hrang hrang chengte inkarah pawh inunauna tha zawk a hrinchhuah ngei ka beisei tlat a ni, a ti.

 MYA Hqrs, New Siaha ten Kut hawnna hla mawi tak sain, Nl. Jesica B. Khuhly, Nl. Priskili leh Tv. C. Zoliantluanga ten mawi leh thiam takin mipui kalkhawmte chu zaiin an awih bawk.  Naupang Laldampuia leh Lalchhanchuahi te pawhin thiam takin Chheilam an entir a, Jt. YMA, Siaha, MTP, Vaihpi branch, YLA Sub-Hqrs, Siaha ten Hnam lam hmuhnawm tak entirna bawk a ni.

Pi Lalnunmawii, SDO (S) chuan lawmman semna hun a hmang a, Pi P. Chaki, President, M.Ch.P Hqrs chuan lawmthu sawinain vawiin Chapchar Kut lawmna hun hi a titawp ta a ni.