Department of Animal Husbandry, Dairying and Fisheries, Ministry of Agriculture, Government of India leh Animal Husbandry & Veterinary Department, Government of Mizoram te tangkawpa huaihawt Training of Farm Managers of the State Cattle, Pig, Poultry Breeding Farms, Semen Collection Centres and AI Officers chu vawiin chawhma dar 10:00 khan Finance Minister Pu Lalsawta’n Polyclinic Conference Hall, Khatla ah a hawng.

Hawnna thu sawiin Khuallian Pu Lalsawta chuan Dr A.B.Negi, Senior Animal Health Advisor, Food and Agriculture Organisation (FAO), United Nations leh pawnlam atanga mithiam rual zirtirna pe tura lo kal te chu Mizoram tan vanneihthlak tiin ran vulhtu ten an hlawkpui ngei a beisei thu a tarlang a. Kum 20/30 chhung leka AH&Vety Department-in vawk/bawng/ar chi tha zawka Mizoram-a ran vulh an thlak danglam thei chu fakawm tiin an hmalakna ah lawmthu a hrilh bawk. ‘Ran vulh leh enkawlna lama nasa taka hma kan sawn laiin a thar chhuah lamah hmasawnna tur a la tam’ tiin Minister chuan sawrkar hmalakna chauh ah innghat lova, mi hausa leh cooperative anga ran tam zawk vulhna din a tul thu te a tarlang a, ram hmasawn nan tan la theuh turin Zoram mipui te a sawm bawk a ni.

Training hawnna hi Dr L.B.Sailo, Director, A.H.& Vety. Department-in a kaihruai a, Aizawl, Kolasib, Mamit, Champhai leh Serchhip District huama neih ah hian Dr A.B.Negi bakah mithiam dangte - Dr Pushpendu Panja, Dr Vikram Vashisth, Dr Dhireswar Kalita leh Dr Probhakar Biswas ten zirtirna an pe dawn a ni. Ni 26.9.2015 hian Lunglei, Lawngtlai leh Saiha District te pualin Lunglei ah Training hi buatsaih tum a ni bawk.